𝐓𝐀𝐍𝐉𝐎𝐌𝐁𝐀𝐓𝐎 : 𝐒𝐄𝐓𝐑𝐎𝐊𝐀 𝐌𝐀𝐈𝐍𝐓𝐘 𝐍𝐀𝐍𝐄𝐋𝐈𝐍𝐆𝐄𝐋𝐈𝐍𝐀 𝐌𝐏𝐎𝐍𝐈𝐍𝐀, 𝐎𝐑𝐈𝐍𝐀𝐒𝐀 𝐈𝐑𝐀𝐘 𝐍𝐀𝐌𝐏𝐈𝐓𝐀𝐍𝐃𝐑𝐄𝐌𝐈𝐍’𝐍𝐘 𝐌𝐄𝐃𝐃

Natao ny zoma 19 jona 2026 ny fidinana ifotony, niarahan’ny MEDD tamin’ny solontenan’ny Kaominina Tanjombato. Nandritra izany no nahitana tsy fahatomombanana teo amin’ny fiasan’ny chaudière ampiasain’ilay orinasa. Hita ihany koa ny fisian’ny fako taratasy sy plastika tao an-toerana, izay voalaza fa anisan’ny mety niteraka ilay setroka mainty nandoto ny rivotra sy nampiahiahy ny mponina manodidina.

Tsy natao ambanin-javatra ny zava-nisy. Araka ny fanamarinana teny an-toerana, neken’ny tompon’andraikitry ny orinasa ireo lesoka hita. Noho izany, nampitandremana avy hatrany ilay orinasa ary nomena fe-potoana 30 andro hanitsiana ireo tsy fetezana ara-teknika sy ara-tontolo iainana rehetra. Mazava ny hafatra : tsy maintsy hajaina ny fenitra, ary tsy azo ekena ny fandotoana rivotra mety hanimba ny fahasalaman’ny vahoaka.

Manamafy ny MEDD fa tsy maintsy mandray andraikitra ireo orinasa mpamokatra rehetra. Ny fampandrosoana ara-toekarena dia tokony handeha miaraka amin’ny fanajana ny tontolo iainana, fa tsy hanitsakitsaka azy. Tsy vitan’ny hoe adidy ara-dalàna izany, fa andraikitra ara-moraly ihany koa amin’ny mponina, indrindra amin’ireo faritra ipetrahan’ny olona sy ahitana fivezivezen’ny vahoaka isan’andro.

Ity tranga tao Forello-Tanjombato ity dia fampahatsiahivana mazava fa manana zo hiaina amin’ny rivotra madio ny olom-pirenena. Ankasitrahana ny fanairana sy fampitam-baovao nataon’ny mponina, satria nahafahana nandray fepetra haingana. Etsy ankilany, ampitandremana ireo orinasa rehetra : tsy maintsy hajaina ny lalàna sy ny fenitra ara-tontolo iainana, fa raha mbola mitohy ny tsy fanarahan-dalàna dia tokony hisy fepetra henjana kokoa horaisina.

 𝘔𝘪𝘯𝘪𝘴𝘪𝘵𝘦𝘳𝘢𝘯’𝘯𝘺 𝘛𝘰𝘯𝘵𝘰𝘭𝘰 𝘐𝘢𝘪𝘯𝘢𝘯𝘢 𝘴𝘺 𝘯𝘺 𝘍𝘢𝘯𝘥𝘳𝘰𝘴𝘰𝘢𝘯𝘢 𝘓𝘰𝘷𝘢𝘪𝘯𝘫𝘢𝘧𝘺