Nandritra ny lanonana fitokanana SEKOLY tsy fanamarihana n’y faha 30 taona niseharana amin’ny politika n’y Solombavambahoaka, dia nanambara ny Ben’ny Tanàna ao amin’ny Commune Ambalamahasoa ,Distrikan’i Lalangina ,Faritra Mahatsiatra Ambony, fa mbola tsy nisy sekoly naorin’ny Fanjakana tao amin’ity kaominina ity hatramin’izao. Nohamafisin’ny Solombavambahoakan’i Lalangina izany, ary nankasitrahany ireo mpiara-miombon’antoka nandray anjara tamin’ny fananganana fotodrafitrasa fanabeazana tao an-toerana.
Tao anatin’ny lahateniny , ny Filohan’ny Antenimierampirenena dia nanamafy fa anisan’ny fototry ny fampandrosoana ny fanabeazana. Ho fanohanana izany dia nanolotra fanampiana ara-bola ho an’ny fananganana sekoly ao Ambalamahasoa izy, ary nanome valisoa ho an’ireo mpianatra nahazo vokatra mendrika.
Nifanojo tamin’ny fanamarihana ny faha-30 taona nandraisan’i Jean Bosco Rivotiana anjara teo amin’ny sehatra politika sy ny fanompoam-bahoaka ny hetsika, izay natrehin’ireo manampahefana sy olom-boafidy maro.
