𝐘𝐞𝐦𝐞𝐧: 𝐦𝐩𝐚𝐧𝐚𝐨 𝐠𝐚𝐳𝐞𝐭𝐲 𝐢𝐫𝐚𝐲 𝐧𝐚𝐦𝐨𝐲 𝐧𝐲 𝐚𝐢𝐧𝐲 𝐭𝐚𝐨𝐫𝐢𝐚𝐧’𝐧𝐲 𝐟𝐢𝐩𝐨𝐚𝐡𝐚𝐧’𝐧𝐲 𝐟𝐢𝐚𝐫𝐚𝐧𝐲 𝐭𝐚𝐨 𝐌𝐮𝐤𝐚𝐥𝐥𝐚

Niharan’ny fanafihana nahafaty olona ny mpanao gazety Mohamed Aida, ny harivan’ny 24 Jona, tao an-tanànan’i Mukalla, any amin’ny faritanin’i Hadramawt, Yemen. Araka ny fitantarana voaray, vao avy nanatitra ny vadiny sy ny zanany efatra tao an-tranony izy no niainga ho any amin’ny birao eo an-toerana an’ny fahitalavitra saodiana mpitatitra vaovao Al Arabiya. Fotoana fohy taorian’izay, tokony ho tamin’ny 6 ora hariva, dia nipoaka ny fiarany.

Araka ny vaovao azon’ny Reporters Without Borders na RSF, dia baomba namboarina tanana no nahatonga ilay fipoahana. Mbola eo am-piandrasana ny valin’ny fanadihadiana ofisialy anefa ny raharaha, ka tsy mbola fantatra mazava hatreto ireo mety ho tompon’antoka na ny antony nanosika ny fanafihana.

Nambaran’ireo mpiara-miasa amin’i Mohamed Aida fa naharay antso sy hafatra fandrahonana, ary koa hafatra feno fanevatevana tsy fantatra anarana, izy tao anatin’ny andro vitsivitsy nialoha ny nahafatesany. Voalaza ihany koa fa tsy vao izao no nisedra fandrahonana izy, fa efa nisy tranga mitovitovy tamin’izany nandritra ireo taona lasa.

Naneho alahelo lalina ny RSF manoloana ity famonoana ity. Nambaran’ny fikambanana fa loza mampalahelo lehibe izy ity, sady mampahatsiahy indray ireo vanim-potoana nahatsiravina nisian’ny famonoana mpanao gazety tany Yemen. Ho an’ny RSF, mampanahy manokana ny zava-misy satria efa nisy famantarana mialoha tamin’ireo fandrahonana niverimberina nahazo ilay mpanao gazety.

Mihoatra lavitra noho ny fahafatesan’olona iray ny lanjan’ity raharaha ity. Mampiseho indray ny loza atrehin’ny mpanao gazety miasa any amin’ny faritra misy fifandonana sy tsindry politika izy, indrindra rehefa mikasika lohahevitra saro-pady ny asa fanaovan-gazety. Raha tsy voaaro ny mpanao gazety, dia voa mivantana ihany koa ny zon’ny vahoaka hahazo vaovao marina sy tsy miankina.

Noho izany, miantso ny manampahefana mahefa ny RSF mba hanatanteraka fanadihadiana lalina, mangarahara ary mahaleotena momba ity famonoana feno habibiana ity. Tanjona amin’izany ny hamantarana ireo rehetra mety ho voarohirohy, sy hitondrana azy ireo eo anatrehan’ny fitsarana, ao anatin’ny fanajana tanteraka ny lalàna sy ny fizotry ny fitsarana.

Ny fahafatesan’i Mohamed Aida dia fampahatsiahivana indray fa mbola marefo ny fiarovana ny mpanao gazety any Yemen. Mitaky valiny mazava, fitsarana marina ary fepetra hentitra hisorohana ny tsy maty manota ny raharaha.