𝐃𝐑𝐄𝐍 𝐌𝐄𝐍𝐀𝐁𝐄 𝟕,𝟗𝟎% 𝐀𝐌𝐈𝐍’𝐈𝐑𝐄𝐎 𝐌𝐏𝐀𝐌𝐏𝐈𝐀𝐍𝐀𝐓𝐑𝐀 𝐀𝐓𝐎 𝐌𝐄𝐍𝐀𝐁𝐄 𝐈𝐇𝐀𝐍𝐘 𝐍𝐎 𝐌𝐏𝐈𝐀𝐒𝐀𝐌-𝐏𝐀𝐍𝐉𝐀𝐊𝐀𝐍𝐀

Nanantanteraka fiarabana tratrin’ny taona ny fitaleovam-paritry ny fanabeazam-pirenena ato Menabe niaraka tamin’ny farimpiadidiam-pampianarana Morondava ka nandritra izany no nitondran’ny talem-paritra mpisolo toerana ny tatitr’ireo asa vita nandritran’ny taona 2024 lasa iny ka fantatra tamin’izany fa mpampianatra sy mpandraraha eo anin’y fampianarana ato Menabe miisa 3844 no nisitraka fampihofanana ary dabilio 120 no nozaraiana ho an’ny fanabezana fototra tato Menabe tamin’iny taona 2024 iny .

Miisa 4073 moa ny mpampianatra rehetra ato Menabe ka ny 322 ihany no mpiasam-panjakana izany hoe ny 7,90 an’ireo mpampianatra rehetra ato Menabe raha miisa 1442 kosa efa nahazo fifanaraham-piarahamiasa (contractuel) ary 2 309 dia mpampianatra FRAM avokoa izany hoe 56 ,69 isan-jaton’ireo mpampianatra ato Menabe ; nambaran’ny talemparitra mpisolo toerana nandritrin’ny tatitry tatitra nataony ihany koa fa ny 80,95 isan-jaton’ireo mpampianatara ato Menabe dia eny amin’ny tontolo amabanivohitra .

Na dia eo aza izany dia manao ezaka lehibe ny minisiteran’ny fanabeazam-pirenena ho an’ny faritra Menabe amin’ny alalan’ny fitaleovam-paritra amin’ny fampivoarana ny fampianarana ato Menabe satria ny tarigetran’izy ireo dia ilay tenin’ny Nelson Mandela hoe « Ny fahalalana dia fitaovam-piadiana mahery vaika manova izao tontolo izao » ka mba hanatan-terahana izany dia maro ireo sekoly naorina satria dia miisa 54 izany tamin’iny taona 2024 iny izay nataon’ny minisitera sy ireo mpiara-miombonantoka aminy eo koa ireo sekoly manarampenitra izay miisa 14 efa an-dalampahavitana saingy misy olana avokoa ka anatin’ny mitady vahaolana tanteraka ny fitaleovam-paritra sy ny minisitera amin’izao ny mba hanafangainana ny famitana ireo sekoly manarampenitra ireo .

Etsy ankilany dia entitra amin’ny ady amin’ny kolikoly ny fitaleovam-paritry ny fampianarana fototra ato Menabe ka hamafisina ny fanaraha-maso sy fampihofanana ny FEFFI mba hanatsarana hatrany kalitaon’ny fanabeazam-pirenena ato Menabe sy hampiakarana ny vokatra tsara satria ny taona 2024 dia 80,73% an’ireo mpiadina nanala ny fanadinam-panjakana CEPE no afaka raha 78,99 % kosa ny ho an’ny mpiadina BEPC.

Nangonon’i RA PA