Notanterahina tamin’ny fomba malagasy tanteraka androany 7 Febroary 2025 ny fitokanana ny biraon’ny Fikambanana AVOMITIA, fotodrafitr’asa vaovao azo tamin’ny fiaraha-miombon’antoka amin’ny GEF SGP Madagascar UNDP ao anatin’ny fanatanterahana ny tetik’asa OP7Y3.

Fankalazana sy Fomba Malagasy.

Natao tamim-pomba manetriketrika ny lanonana, nahitana ny fangatahan-tsaotra sy ny vono omby niarahana tamin’ireo Ray aman-dReny ara-drazana sy ny Fokonolona mpikambana. Tafiditra ao anatin’ny hetsika izany ho fanomezana voninahitra sy fankasitrahana ny toerana, izay manana lanja ara-tantara lehibe amin’ny tantaran’ny Fanjakana Betsileo.

Fikambanana AVOMITIA sy ny Tanjony.

Ny Fikambanana AVOMITIA dia fikambanana miaro sy mitantana ny hasin’ny Rova Ialananindro, izay ao amin’ny Kaominina Ambanivohitra Ialananindro, Distrikan’i Lalangina, Faritra Matsiatra Ambony. Raha tsy hilaza fotsiny dia tao amin’ity toerana ity no nipoiran’ny Fanjakana Betsileo raha jerena amin’ny tantaran’i Matsiatra Ambony.

Manana vina mazava ny Fikambanana AVOMITIA:

Hanome lanja sy hitahiry ny tantaran’ny Rova Ialananindro

Hampiroborobo ny fizahan-tany ao amin’ny faritra.

Efa ahitana mpitsidika liana amin’ny tantaran’ny toerana, porofon’ny fahazotoan’ny rehetra amin’ny fitehirizana sy fampahafantarana ny vakoka ara-kolontsaina.