Namela takaitra lalina teo amin’ny mponina ao amin’ny Fokontany Tsiadana ny fandalovan’ny rivodoza FYTIA, ny alin’ny Sabotsy 31 Janoary hifoha ny Alahady 01 Febroary 2025.
Tamboho iray no nirodana tamin’ny 2 ora maraina, ka niteraka fahasimbana lehibe tamin’ny trano iray teny an-toerana. Soa ihany fa tsy nisy aina nafoy, satria tsy nisy olona natory tao amin’ilay efitra voakasika tamin’io fotoana io. Marihina fa mpitandro filaminana ilay tompon’ny efitra, ary sendra nandeha nanao iraka manokana (mission) izy tamin’io alina io.
Tsy ilay trano iray ihany anefa no voakasika, fa trano maro manodidina ihany koa no niharan’ny fianjeran’ny tamboho, ka samy nahitana fahasimbana avokoa. Ankoatra izany, andin-jiro iray no voadona vokatry ny vato lehibe nianjera, ka tapaka tanteraka ny jiro teo amin’ny manodidina, hatramin’ny ora nanaovana ny fanadihadiana.
Fantatra fa tsy eto an-toerana ny tompon’ilay trano misy ny tamboho, fa “gardien” no miambina ny toerana. Efa niezaka nifandray tamin’ny tompon-trano ireo mponina sy niharam-boina, saingy tsy mbola nahazo valiny hatramin’izao.
Manoloana ny zava-nisy, nanomboka tamin’ny 6 ora sy sasany maraina ireo mponina no niantso ny mpamonjy voina (Pompier), saingy tamin’ny 10 ora maraina vao tonga teny an-toerana izy ireo. Ny Polisim-pirenena kosa dia tonga tamin’ny 10 ora sy sasany maraina.
Tsikaritra ihany koa fa maro ireo tamboho miorina tsy ara-dalàna manamorona ireo lalan-kely ao Tsiadana, ka mety hitera-doza ho an’ny vahoaka, indrindra mandritra ny fotoanan’ny orambe sy rivo-doza. Noho izany, miantso ny tompon’andraikitra ny mponina mba handinika sy handray fepetra maika, hisorohana ny loza mety hitranga amin’ny ho avy.
Nangonin’ Lay Mahitsy
