𝐅𝐊𝐓 𝐓𝐒𝐈𝐀𝐃𝐀𝐍𝐀 : 𝐍𝐀𝐍𝐄𝐇𝐎 𝐍𝐘 𝐓𝐒𝐘 𝐅𝐀𝐇𝐀𝐅𝐀𝐋𝐈𝐀𝐍𝐘 𝐍𝐘 𝐌𝐏𝐎𝐍𝐈𝐍𝐀, 𝐍𝐎𝐇𝐎𝐍’𝐍𝐘 𝐅𝐀𝐍𝐀𝐕𝐀𝐊𝐀𝐕𝐀𝐇𝐀𝐍𝐀 𝐇𝐎𝐀𝐍’𝐈𝐑𝐄𝐎 𝐍𝐈𝐒𝐈𝐓𝐑𝐀𝐊𝐀 𝐈𝐋𝐀𝐘 𝐓𝐈𝐂𝐊𝐄𝐓 𝐇𝐀𝐇𝐀𝐙𝐎𝐀𝐍𝐀 𝐕𝐀𝐑𝐘 𝟓𝟎𝐊𝐠

Naneho ny hatezerany ireo Mponin’ny Fokontany Tsiadana ny tolak’andro teo nohon’ny fiparitahan’ny resaka fa efa nisy andian’olona nisitraka sy nahazo ilay vary 50kg isan’olona fanampiana avy amin’ny Filohan’ny Repoblika.

Nobahanan’izy ireo ny arabe izay narahina fandoroana kodiara, nijoalajoala ny afo, ary ny hiakiak’izy ireo, dia hoe, nahoana no misy fiangarana, nahoana no misy mahazo ticket, misy tsy mahazo.

Araka ny filazan’ireto vahoaka marobe tonga nanatanteraka ity tsy fahafaliana ity, dia nahodikodin’ny Filoham-pokontany sy ireo mpiara-miasa aminy ny vary fanampiana, ary izay naman’izy ireo ihany no mahazo ticket. Izay midika fa misy ny kitranotrano.

Niezaka niantso ny Filoham-pokontany izahay, fa tsy nahazo azy, fa arak any filazan’ireo mpiara-miasa aminy, dia lasa any amin’ny Domaine Ankadinratombo izy naka ny fanampin’ireo Ticket hozaraina ireo.

Nanambara hatrany ity mpiara-miasa aminy ity, fa aorian’ny fifidiana vao afaka zaraina ireo ticket hahafahana maka ny vary, ary hahazo avokoa izay manana Karinem-pokontany rehetra.

Tonga nandamina sy nifehy tsy hitaran’izany hetsika izany ny Polisim-pirenena ka tsy hiteraka korontana, niverina nilamina ihany ny tanana rehefa nitehon-kohariva ny andro, izany hoe tamin’ny 6.30 minitra tany ho any.