Soamandroso/Antanimbary ( RN4): Malaza mitrongy tany fambolem-bary ny mponina amin’ny » Engins » ireo teratany Sinoa mitrandraka volamena any an-toerana.
Nanakohako nandritra ny andro maro tamin’ny alalan’ny feo niely etsy sy eroa ny fitrandrahana volamena miampy fanampotehana tany fambolem-bary ny mponina amin’ny » Engins, » any amin’ny fokontany Soamandroso, any amin’ny kaominina ambanivohitra Antanimbary, ato anatin’ny disitrikan’i Maevatanàna, izay nataon’ireo Sinoa Kely maso tsy fantam-pihaviana. Nohon’io tranga io dia nidina nijery ny zava-misy tany an-toerana ny tompon’andraikitra misahana ny harena an-kibon’ny tany ato anatin’ny faritra Betsiboka sy ny ben’ny tanàna miandraikitra iny faritra iny, ny lehiben’ny Zandary any Antanimbary. » Tamin’izany indrindra no nametrahana lamina sy marimaritra niraisana tamin’ireo Sinoa Kely maso sy ny mponina tompon’ilay tany fambolem-bary, ary ny fampifantarina ny roa tonta ny lalàna mifehy ny fitrandrahana. Etsy an-daniny dia milaza ny tompon’andraikitra misahana ny harena an-kibon’ny tany fa ara-dalana ny taratasy ahafan’ireo Sinoa mitrandraka volamena any amin’ny toerana voalaza etsy aloha. Eto am-pamaranana ny lahatsoratra dia tsara hatrany ny mampahafantatra fa dia manao izay tiany atao amin’ny fitrandrahana, any amin’iny faritra iny ry zalahy Sinoa Kely maso.
Zandry be Tantely
