Hiasa mafy fa mirindra sy milamina ao anaty herinandro ireo mpikirakara ny fanadinam-panjakaa CEPE 2024 ato amin’ny Fari-piadidiam-pampianarana Port-Bergé mba hahatafavoahana ny vokatra alohan’ny 26 Jona, hoy Chef CISCO Rahamaizara Régis. 21 ny foibem-panadinana izay ahitana efitranom-panadinana 146 ary 5.243 no mpiadina voasoratra anarana ato amin’ny Disitrikan’i Port-Bergé. 5 ka hatramin’ny 6% eo ny fiakaran’ny tahan’isan’io raha ampitaina tamin’ny taona lasa.
Tao amin’ny foibem-panadinana CEG Tsarasaotra Port-Bergé izay ahitana efitranom-panadinana 36 sy mpiadina voasoratra anarana 930 no nanokafana izao fanadinam-panjakana voalohany izao ho an’ny CISCO Port-Bergé. Ny Lehiben’ny Disitrika, Todivelo Cyrille no nanaokatra azy ara-panjakana sy tamin’ny fomba ofisialy. Nanome voninahitra izany ny Ben’ny tanàna andrenivohitta sy ireo Lehiben’ny mpitandro ny filaminana eto an-toerana.
Ankoatra ireo iraka manokana nalefan’ny Talem-paritra avy any Antsohihy dia tonga hanara-maso ny fizotran’ny fanadinana izao koa ny Talen’ny ONEP (Office National de l’Enseignement Privé) izay sady Tale Mpiahy ny Faritra Sofia eo anivon’ny Minisiteran’ny Fanabeazam-pirenana, Jean Emile.
Hatramin’ny hariva nifaran’ny adina teo dia tsy nisy olana govana ny tato anaty Disitrikan’i Port-Bergé. Marihina fa 09 taona no zandry raha 20 no zokiny indrindra amin’ireo mpiadina voasoratra anarana ato amin’ny CISCO Port-Bergé.
Nangonin’i Gabin Eloi
