Tsy mangasiasy fa faly sy ravo ireo ankizy zanaky ny Mahery Fon’ny Zandarimariam-pirenena ao amin’ny Akanin’ny Zandarimaria Arivonimamo, androany, nankalaza ny noely. Tsy diso anjara amin’izany fankalazana izany izy 61 mianadahy taizana sy beazina ao amin’ny akany.
Tsy navelan’ireo tompon’andraikitra ambony avy eo anivon’ny Zandarimaria, tarihan’Atoa jeneraly Andry RAKOTONDRAZAKA, Minisitra Delege misahana ny Zandarimaria sy ramatoa vadiny, Atoa jeneraly RAKOTOMALALA Andriatahina Jean Herbert, komandin’ny Zandarimariam-pirenena sy ramatoa vadiny, miaraka amin’ireo mpiara-miasa aminy, hangahiahy ireto ankizy amin’izao noely izao.
Kilalao, seho miavaka samihafa no nentina nanamarihana ny noelin’ny akany tamin’ity taona 2024 ity. Tonga nifanotrona tamin’ireto zanaky ny mahery fon’ny Zandarimaria ireto, nandritra ny fankalazana androany, ny solotenan’ireo ankizy taizana ao amin’ny akanin’ny Tafika malagasy sy ny avy ao amin’ny Polisim-pirenena.
Ny Zandarimariam-pirenena moa dia mametraka ho ambony ary ho lohalaharana foana ireto ankizy ireto.
Loharano nanovozana : Gendarmerie Nationale – Madagascar
