Mahatratra 7.600 isan-taona ireo mamoy ny ainy sy mitondra takaitra vokatry ny loza-pifamoivoizana an-dalambe eto amintsika raha ny antontan’isa avy amin’ny Minisiteran’ny Fitaterana sy ny famatarana ny toetr’andro.Mavesatra io antontan’isa io raha nambaran_dRamatoa Harimbola Monica Rasoloarisoa, filohan’ny Holafitry ny Mpanao Gazety eto Madagasikara.Manodidina ny 25 ka hatramin’ny 29 isan-taona kosa izany ho an’ny mponina 1 hetsy eto Madagasikara raha ny antontan’isa avy eo anivon’ny banky iraisam-pirenena.Manana andraikitra amin’ny fisorohana izany ny mpanao gazety noho ny asa fanaovan-gazety izay fantsona hampitana hafatra, hanampy amin’ny fisorohana ny lozam-pifamoivoizana ary ny fipetrahan’ireo mpanao gazety ho modely ho an’ny fiaraha-monina.Maro amin’ireo mpanao gazety ankehitriny no mampiasa fiara sy moto ho fitaovam-pivezivezena mandritra ny fanatanterahana ny asany. Nanao ho zava-dehibe ny fiahiana azy ireo ny Holafitry ny Mpanao Gazety eto Madagasikara (OJM) sy ny trano fiantohana NY HAVANA ka hiara-hiasa amin’ny fampihenana 50 isan-jato ny saran’ny fiantohana moto sy fiarakodia ho an’ireo mpanao gazety sy ny vady aman-janany mpikambana ao amin’ny OJM. Tontosa androany tetsy amin’ny NY HAVANA 67 Ha ny fifanaovan-tsonia teo amin’ny roa tonta.Fiaraha-miasa izay hifantoka sy manana vina iraisana ny hampandroso sy hanome lanja ny maha-olona amin’ny alalan’ny fametrahana fiantohana mendrika. Ilaina ny fananana fiantohana ary heverina hanamafy ny ady ho fisorohana ny lozam-pifamoivoizana ny fiahiana manokana ny mpanao gazety toy izao. Mifanojo indrindra amin’ny fanamarihana ny andro manerantany hatsiarovana ireo namoy ny ainy sy nitondra takaitra vokatry ny lozam-pifamoivoizana.
M.Elvina
