DPJ-DRSP ATSINANANA
FANAFARANA SY FITAZOMANA ZAVA-MAHADOMELINA MAHERY VAIKA: COCAÏNE MILANJA 64,32 KG SARON’NY POLISY TANY TOAMASINA , TELO LAHY TOMPON’ANTOKA NALEFA ENY TSIAFAHY
Cocaïne milanja 64,32 kg no tra-tehaky ny Polisy ny alatsinainy 19 febroary 2024 tao amin’ny toeram-pametrahana entan’ny orinasa lehibe iray ao Androranga Toamasina. Naharay angom-baovao ny Polisy mahakasika ny fivezivezen’ny zava-mahadomelina mahery vaika ao Toamasina sy ny fikasana hanaparitaka izany eto an-drenivohitra sy manerana ny Nosy. Araka izany dia nisy ny fisavana natao tamin’ny « entrepôt » iray tao Androranga ny 19 febroary lasa teo ka tamin’izany no nahatratrarana vovon-javatra miloko fotsy notsinjaraina anaty harona plastika miisa 57 .Nosamborina avy hatrany ireo telo lahy tompon’ilay toerana fitehirizan’entana ary nentina nihazo an’ Antananarivo hatao famotorana.
Rehefa natao ny « test » dia fantatra fa cocaïne avokoa ireo hita tany Toamasina ireo . Nogiazana avy hatrany moa ireo cocaïne ireo ary nodorana araka ny fahazahoan-dalana avy tamin’ny fampanoavana.Tombanana ho 19 296 000 000 Ar ny fitambaran’ny tetibidin’ireto cocaïne ireto.
Natolotra ny fampanoavana ny alakamisy 22 febroary ny raharaha ka naiditra am-ponja eny Tsiafahy izy telo lahy ireto.
