Tsy hisy fanovana tena izy izany raha tsy misy ny Lalàna momba ny Tetibola mifanandrify amin’izay zava-misy marina sy ny filan’ny vahoakaAraka ny andininy faha-75 amin’ny Lalàmpanorenana, dia mandritra ity fotoam-pivoriana ara-potoana ity no tokony handaniana ny Lalàna momba ny Tetibolam-panjakana ho an’ny taona 2026 (Loi des Finances Initiale 2026).Tsy mora ny manao izany, satria betsaka ny zavatra mila harenina. Mitaky fandinihana lalina sy fotoana ampy, fa tsy tokony hatao maimaika toy ny efa zary fomba fanao hatrizay.
Araka ny andininy faha-92 amin’io Lalàmpanorenana io ihany, iray volana monja no anananay ao amin’ny Antenimieram-pirenena hanaovana fandinihana (première lecture) sy fandaniana ny tetibolam-panjakana, manomboka amin’ny daty hanoloran’ny governemanta azy. Aorian’izay, 15 andro indray no ananan’ny Antenimieran-doholona hanatanterahana ny fandinihana.Izany rehetra izany dia tsy maintsy vita alohan’ny fiafaran’ity fotoam-pivoriana ara-potoana ity, izay ho tapitra sahady afaka roa volana latsaka.Noho izany dia mila fandraisana andraikitra hentitra sy haingana izao fotoana izao :Tokony hatsangana faran’izay haingana ny governemanta, mba hahafahany manomana sy manolotra ara-dalàna ny tetibolam-panjakana 2026 amin’ny Antenimiera.Tokony ho tafapetraka haingana koa ireo Birao maharitra amin’ny Antenimiera roa tonta, mba hahafahanay olom-boafidy miasa am-pitoniana sy am-pahombiazana.Raha ny Lalàmpanorenana no itondrantsika ny firenena, dia tokony atao laharam-pahamehana ny fandaniana ny Lalàna momba ny Tetibolam-panjakana 2026, araka ny voalazan’ny lalàna rehetra manan-kery.Izaho mino fa azo atao tsara ny manatanteraka izany raha samy maneho fahavononana sy finiavana ny tompon’andraikitra rehetra eto amin’ny firenena, ka samy mijoro ho amin’ny tsaratsara kokoa.
Izaho, amin’ny maha Solombavambahoaka voafidy tao amin’ny distrikan’i Fandriana ahy, dia miezaka hatrany hanatanteraka an-tsakany sy an-davany ny andraikitra napetraky ny vahoaka amiko.Izay no nifidianannareo ahy, ary izay no anakaramana ahy amin’ny alalan’ny hetra aloan’ny Malagasy tsirairay : ny hiasa ho tombontsoan’ny vahoaka malagasy iray manontolo.
Sahia manova !
Zavamanitra Andriamiharivolamena
