Zava-baovao ao Farafangana | mitondra paikady hentitra hiadiana amin’ny tsy fandriampahalemana ny Zandary

Nitondra fanantenana sy fepetra hentitra ho an’ny fandriampahalemana i Lieutenant-Colonel Kotomanjarisoa Manjary, Lehiben’ny Zandary vaovao teto amin’ny Faritra Atsimo Atsinanana, nandritra ny fihaonana voalohany nataony tamin’ireo zandary mpibaiko avy amin’ny toby samihafa ao amin’ny faritra.

Nandritra ity fihaonana manokana ity, dia nanome toromarika mazava sy hentitra ny Lehiben’ny Zandary, mikasika ny fomba fiasa sy paikady vaovao entina hanamafisana ny ady amin’ny tsy fandriampahalemana, izay mbola manelingelina ny fiainan’ny mponina amin’ny toerana sasantsasany.

Paikady mazava, tanjona tokana: ny hanjakazakan’ny fandriampahalemana maharitra amin’ny Faritra Atsimo Atsinanana.

Tafiditra ao anatin’izany ny fanamafisana ny fisafoana, fanatsarana ny tambajotra fifandraisana eo amin’ny andrim-piarovana sy ny vahoaka, ary fandrindrana hentitra kokoa amin’ireo vondrona miandraikitra ny filaminam-bahoaka.

Nanambara i Lt Col Kotomanjarisoa fa “tsy maintsy miverina amin’ny laoniny ny filaminana, ary andraikitry ny zandary ny mitondra izany ho zava-misy. Mila fiaraha-mientana sy fandraisana andraikitra hentitra avy amin’ny rehetra izany.”

‘Lay Mahitsy

Tahina Flavien