Ofana naharitra 6, nanomboka ny 26 Desambra ka hatramin’ny 31 Desambra taona 2024 lasa teo no notanterahin’ny Faritany Tily eto Itasy, izay natao tao Faliarivo Soavinandriana Mpiandraikitra Tily miisa 100 mianadahy teo ho eo no tonga nanatrika ity ofana ity, ary nahita ny Sokajy rehetra misy eto anivon’ny Tily eto Madagasikara, dia ny Sampana Mavo, Sampana Maitso, ary ny Sampana Mena. Tanjona tamin’ity ofana ity dia hampitomboina bebe kokoa ny fahaiza-manao, sy fahaiza-mitarika hananan’ireto Mpiandraikitra ireto, ary natokana hoan’ny Mpiandraikitra Tily irery ihany ity ofana ity araka ny fanazavana nomen’i Falengy Sariaka Filohan’ny Lasy.
Mivelatra ao anatin’ny Distrika 3, eto anivon’ny Faritra Itasy ny Faritany Tily Itasy, ary ahitana Fivondronana miisa 54, arak any fanampim-panazavana nentin’i Mamiratra RAHARINANTOANINA izay Filoham-paritany Tily Itasy. Nasiany tsindrim-peo manokana fa mavitrika ary mazoto ny Mpiofanana nanatrika izao fiofanana izao, misy mihintsy aza hoy izy nandeha tongotra nahatritra iray andro sy tapany vao nahita fiara nahatongana teto, kanefa dia mbola tarehy miramirana sy fo feno tsiky hatrany no hita eny amin’ny endrik’ireto Mpiandraikitra Tily ireto. Nambarany hatrany fa fanabeazana mahomby tanteraka ny fanabeazana Skoto, na dia somary hafahafa aza ny fandraisan’ny mpiara-belona azy.
Fa Fiofanana ampy ary mifandraikitra amin’ny vanin’andro ankehitriny no omena ny ny Mpiofana ary tsy mena mitaha amin’ny fiofanana hafa io kosa indray no nolazain’i Fosa Kingasaina izay Talen’ny Fanofanana Mpiandraikitra Faritany Tily Itasy raha tafaresaka taminay.
Tiana hatrany ny manamarika fa feno 100 taona ny Fanabezana Skotisma eto Madagasikara, ka hetsika marolafy no efa nanombohana sy nanamarihana izany tsingerin-taona miezinezina izany.
Mahatoky ny Tily, satria Tily indray andro… Tily mandrakizay
Nangonin’ Lay Mahitsy
