Naneho ny fanajany ny didim-pitsarana sy ny fanapahan-kevitry ny andrim-panjakana ny Ben’ny Tanànan’Antananarivo, Harilala Ramanantsoa, taorian’ny fanambarany fa handao ny andraikiny eo anivon’ny fitantanana ny renivohitra.
Tamin’ny hafatra natolony ho an’ny mponin’Antananarivo sy ny olom-pirenena Malagasy dia nilaza izy fa raisiny am-panajana tanteraka ny fanapahan-kevitry ny Filankevi-panjakana, araka ny fitsipiky ny Fanjakana tan-dalàna. Nohamafisiny fa ao anatin’ny rafitra demokratika, ny fanajana ny andrim-panjakana sy ny didim-pitsarana no antoka iorenan’ny filaminana sy ny fitoniana eo amin’ny fiainam-pirenena.
Nambaran’i Harilala Ramanantsoa fa andraikitra mavesatra ny fitantanana ny renivohitr’i Madagasikara, satria mitondra ny lanjan’ny tantara, ny fanamby maro ary ny fanantenan’ny firenena manontolo. Na izany aza anefa dia naneho fireharehana izy noho ny fahafahana nanompo ny Tanànan’Antananarivo sy ny vahoaka ao aminy nandritra ny fotoana nitondrany.
Na dia eo aza ny fialany amin’ny andraikiny, dia nanazava izy fa hitohy hatrany ny fitantanana ny raharaham-panjakana andavanandro eo anivon’ny Tanànan’Antananarivo, miaraka amin’ny ekipan’ny kaominina sy ny mpiasan’ny CUA, mandra-pahatongan’ny famindram-pahefana araka ny lalàna sy ny fitsipika mifehy izany.
Nisaotra manokana ireo mpiasan’ny Tanànan’Antananarivo ihany koa izy noho ny ezaka sy ny fanoloran-tena nasehon’izy ireo, indrindra tamin’ny fanamafisana ny fanompoam-bahoaka sy ny fametrahana fitantanana mangarahara sy akaiky ny mponina, na teo aza ireo sakana sy olana sedraina.
Tsy hadinony ihany koa ny naneho fankasitrahana ireo mponin’Antananarivo, ireo mpifidy ary ireo rehetra nanohana ny asa sy ny ezaka nataon’ny Tanànan’Antananarivo nandritra ny fotoana nitondrany.
Ho an’ireo mpanolotsain’ny Tanàna avy amin’ny firehan-kevitra politika samihafa dia nambarany fa na dia nisy aza ny adihevitra mafana sy ny fahasamihafan’ny fomba fijery, dia niara-niasa hatrany izy rehetra tamin’ny tanjona iray, dia ny hanasoavana an’Antananarivo.
Nisaotra ireo mpiara-miombon’antoka sy andrim-panjakana samihafa ihany koa ny tenany, izay niara-niasa tamin’ny Tanànan’Antananarivo ka nahafahana nanatanteraka tetikasa maro ho an’ny renivohitra.
Nohamafisin’i Harilala Ramanantsoa fa mbola maro ny fanamby miandry an’Antananarivo. Araka ny nambarany, mendrika ezaka sy firaisankina bebe kokoa ny renivohitra, ary mila vina matanjaka sy fiaraha-mientana afaka manandratra azy ho isan’ireo renivohitra manan-danja eto amin’ny faritra.
“Antananarivo dia tsy an’ny fe-potoam-piasana iray na an’olon-tokana, fa an’ny vahoaka ao aminy sy an’ny hoaviny,” hoy izy namarana ny hafany.
Natao dika et ambany ny fanambarany tao amin’ny Takelaky ny Kaominina Antananarivo
