Tamin’ireo anarana telo natolotry ny vondron’ireo solombavambahoaka maro an’isa avy eo anivon’ny Antenimieram-pirenena tamiko dia Andriamatoa NTSAY Christian no notendreko ho Praiminisitra lehiben’ny governemanta.
Mazava ny anton’ny safidiko satria mila olona za-draharaha sy mahitsy ary tsy mivadi-pitokisana ny fanatanterahana ny fampandrosoana tiantsika apetraka. Mila olona mahafehy ireo asa fampandrosoana sy ny fanatanterahana ireo vina efa natomboka ny tenako. Masina loatra ny fahatokisana napetraky ny vahoaka Malagasy amiko ary tsapako fa miandrandra fampandrosoana mipaka isan-tokantrano ny olom-pirenena. Noho izany dia mila mitondra vahaolana haingana sy maharitra isika eo amin’ ireo fanamby apetraka sy ny olana iainana hatrizay sy ankehitriny.
Tsy mora ny andraikitra sy asa hosahaniny, tsy vita mora ihany koa ny ady amin’ny fahantrana. Koa hatrehantsika miaraka izany mba hampandrosoana an’i Madagasikara sy ny vahoaka Malagasy iray manontolo.
📷 : Andry Rajoelina
