FARM Analamanga | Niofana mahakasika ny ady atao amin’ny Herisetra tany amin’ny Kaominina Fiaferana, Antananarivo Avaradrano
—
Andro maromaro lasa izay dia efa nitety tanana dia nanao fanentanana sy nampahafantatra ny fisian’ny herisetra mianjady amin’ny mpiara-belona, sy ny ady atao amin’izany ireo Vehivavy Tantsaha Mpikambana sy Mpikatroka ato anatin’ny Fikambanana FARM ( Femmes en Action Rurales de Madagascar) ka ny Kaominina Fiaferana, ato amin’ny Distrika Antananarivo Avaradrano no nosafidianan’izy ireo hanatanterahana izany.
Ny 01 Desambra 2023 ary, dia nisy ny fampivondronana sy fampiofanana an’ireo Mpikambana ireo, ka Vehivavy Tantsaha maherin’ny 60 mirahavavy no tonga nanatrika izany. Ity fiofanana ity andaniny dia mifanandrify indrindra amin’ny « hetsika herinandro hiadiana amin’ny herisetra » ka nisy ny fifampizarana sy fampitana traikefa hoan’ireo efa ela niantsorohana amin’ity ady atao amin’ny herisetra ity.
Tonga nampita ny fahalalana ananany ihany koa Ramatoa Filoha Nasionalin’ny FARM, Ramatoa RAVONIARISOA Hantanirina Lilia, izay nanatitratitra fa tsy honohono fa tena ho isan’nandro dia misy hatrany ny herisetra miseho eto amin’ny fiaraha-monina, indrindra amin’ny vehivavy, koa manoloana izany indrindra no antom-pisian’izao hetsika tanterahin-tsika izao.
Fantatra fa ny lohahevitra nosafIdiana, dia ny hoe « Ny fahanginana dia firaisana tsikombakomba amin’ny herisetra »
Anisan’ny nentina nanamarihana an’ity hetsika ity moa ny filaharam-be nanodidina ny tanana !
… Adidiko, adidinao ny fanoherana ny herisetra amin’ny lafiny rehetra…
Nangonin’i ‘Lay Mahintsy
