𝐈𝐯𝐚𝐭𝐨 : 𝐓𝐨𝐧𝐠𝐚 𝐧𝐲 𝐟𝐚𝐧𝐚𝐦𝐩𝐢𝐚𝐧𝐚 𝟑𝟎𝟑 𝐭𝐚𝐨𝐧𝐢𝐧𝐚 𝐚𝐯𝐲 𝐚𝐦𝐢𝐧’𝐧𝐲 𝐅𝐞𝐝𝐞𝐫𝐚𝐬𝐢𝐨𝐧𝐚 𝐑𝐨𝐬𝐢𝐚𝐧𝐚

Teny amin’ny seranam-piaramanidina iraisam-pirenena Ivato no nandray izany tamin’ny fomba ofisialy ny Filohan’ny Fanavaozana ny Repoblika, Kolonely Michael Randrianirina, niaraka tamin’ny Praiminisitra sy ireo minisitra vitsivitsy ao anatin’ny Governemanta, ary koa ireo tompon’andraikitra ambony sivily sy miaramila.

Araka ny fanazavana azo, dia natao hanohanana ny ezaka ataon’ny fanjakana amin’ny fiatrehana ny filàna maika sy ny fanamafisana ny fahavononana ara-pitaovana ity fanampiana ity. Ahitana fitaovana ilaina amin’ny asa sosialy sy fanampiana ara-tsakafo ho an’ireo marefo indrindra izany.

Nambaran’ireo tompon’andraikitra nandritra ny lanonana fa mariky ny fifandraisana matanjaka sy ny fifampitokisana eo amin’i Madagasikara sy Rosia izao fanolorana izao. Nanamafy izy ireo fa ny fiaraha-miasa iraisam-pirenena toy izao no anisan’ny andry iankinan’ny fanohanana ny fampandrosoana sy ny fanarenana ara-tsosialy.

Ho zaraina araka ny filàna sy ny laharam-pahamehana apetraky ny fanjakana ireo fitaovana sy fanampiana ara-tsakafo, ka antenaina fa hitondra fanamaivanana ho an’ireo sokajin’olona mila tohana manokana.

Amin’ny ankapobeny, manamarika dingana iray vaovao eo amin’ny fiaraha-miasa stratejika eo amin’ny firenena roa tonta ity fanomezana 303 taonina ity, sady maneho fa mitohy ny fanamafisana ny fifandraisana eo amin’i Madagasikara sy Rosia.