Mifamahofaho ny raharaha ao amin’ny CEG Amparafaravola amin’izao fotoana izao. Taorian’ny nivoahan’ny « note de service » avy amin’ny DREN Alaotra Mangoro, izay manaisotra amin’ny toerany ny Tale mpitantana ity sekoly ity, dia nanao hetsika fanehoana ny tsy fankasitrahany izany ireo ray amandrenin’ny mpianatra sy ny mpanabe ao an-toerana.
Raha ny nambaran’izy ireo dia « tsy azo ekena izao fanapahan-kevitra izao ». Notsindriandrian’izy ireo fa teo ambany fitantanana sy ny ezaka lehibe nataon’ity tale ity no nahatafakatra ambony ny taha-pahombiazana tamin’ireo fanadinana. Araka izany, mahatsapa izy ireo fa tsy mitondra fampandrosoana ho an’ny fampianarana ny fanalana tompom-pandraikitra efa naneho vokatra tsara sy nitondra ny sekoly tamin’ny fahombiazana.
Koa maha-lasa fisainana ny maro amin’ireo mpanabe sy ny ray amandreny ity fepetra noraisin’ny DREN ity. Noho izany, manao antso avo sy manentana ireo tompon’andraikitra isan’ ambaratongany izy ireo mba hijery akaiky ity raharaha ity sy hitady vahaolana malaky sy mahomby, mba tsy hanelingelina ny hoavim-pampianaran’ny mpianatra.
Lova Janà
