𝐓𝐀𝐎𝐋𝐀𝐆𝐍𝐀𝐑𝐎 : 𝐍𝐢𝐟𝐚𝐫𝐚𝐧𝐚 𝐭𝐬𝐲 𝐧𝐢𝐬𝐲 𝐡𝐞𝐫𝐢𝐬𝐞𝐭𝐫𝐚 𝐧𝐲 𝐬𝐚𝐤𝐚𝐧𝐚 𝐭𝐞𝐧𝐲 𝐚𝐦𝐢𝐧’𝐧𝐲 𝐥𝐚𝐥𝐚𝐧𝐚 𝐦𝐚𝐧𝐤𝐚𝐧𝐲 𝐚𝐦𝐢𝐧’𝐧𝐲 𝐨𝐫𝐢𝐧𝐚𝐬𝐚 𝐐𝐌𝐌

Omaly Alahady, tokony ho tamin’ny 10 ora sy 27 minitra, dia noravana ny sakana nataon’ireo mpitaky ny zony. Tsy nisy ny herisetra tamin’izany, fa vokatry ny fifampiresahana sy ny fanelanelanana nataon’ireo Raiamandreny sy ny solontenam-panjakana eto Taolagnaro.

Tsiahivina fa efa nisy ny fifampiresahana teo amin’ny roa tonta, saingy mbola tsy nahitana marimaritra iraisana hatreto. Araka ny fanazavan’ireo mpitaky, dia efa nisy ny didim-pitsarana nivoaka momba ity raharaha ity, ka milaza izy ireo fa efa nahazo rariny teo anivon’ny fitsarana.

Na izany aza, mbola mijanona ho olana ny tsy fahitana vahaolana amin’ny fomba fampiharana izany, ka mitaky fifampiresahana sy fifanarahana mazava eo amin’ny andaniny sy ankilany.

Tapaka nandritra ny fifampiresahana omaly fa hisy fivoriana indray androany tolakandro, izay hiarahan’ireo mpitaky ny zony, ny tompon’andraikitry ny orinasa QMM, ireo Raiamandreny eto Fort-Dauphin ary ny solontenam-panjakana eto an-toerana.

Antenaina fa hitondra vahaolana maharitra izao fifampidinihana izao, indrindra fa ny fiveloman’ireo mponina ao Andranokana no voalaza fa voakasika mivantana. Manana ahiahy izy ireo fa ny olana momba ny tany sy ny fahafahana mamboly dia mety hanasarotra hatrany ny fiainan’ireo tantsaha.

Mbola miandry ny vokatry ny fifampiresahana kasaina hatao androany àry ny mponina sy ireo voakasika rehetra, amin’ny fanantenana fa hahitana vahaolana eken’ny roa tonta.