𝗠𝗘𝗡𝗔𝗕𝗘 : 𝗛𝗮𝘃𝗲𝗿𝗶𝗻𝗮 𝗵𝗮𝘀𝗶𝗻𝗮 𝗻𝘆 𝗳𝗮𝗱𝘆 𝘀𝘆 𝗻𝘆 𝘀𝗼𝗮𝘁𝗼𝗮𝘃𝗶𝗻𝗮 𝗻𝗲𝗻𝘁𝗶𝗻-𝗱𝗿𝗮𝘇𝗮𝗻𝗮

Tafiditra anatin’ny politika lehibe napetraky ny Ministeran’ny Serasera sy ny Kolontsaina ny famerenana hasina ny tany sy ny fampahatsiahivana ireo fady ary fomba amam-panao nentin-drazana manerana an’i Madagasikara. Ho an’ny Fitaleovam-paritry ny Serasera sy ny Kolontsaina Menabe dia laharam-pahamehana ny fampahafantarana sy fampanajana indray ireo soatoavina ara-kolontsaina izay anisan’ny mampiavaka sy miaro ny maha-izy ny faritra Menabe.

Araka ny fanazavan’Andriamatoa Joe Kamamy Modestin, talem-paritry ny Serasera sy ny Kolontsaina Menabe, dia maro amin’ireo fady sy fomba nentin-drazana no manomboka voahosihosy sy tsy hajaina intsony amin’izao fotoana izao. Nambarany fa mety hiteraka olana ara-tsosialy sy ara-kolontsaina  eo amin’ny fiarahamonina izany tsy fanajana izany.

Noho io antony io dia hisy ny fakan-kevitra lehibe mahakasika ireo fady misy eto amin’ny faritra Menabe. Efa natomboka tany Ankimony ny dinika sy fifampidinihana niarahana tamin’ireo ray aman-dreny ara-drazana sy tompon’andraikitra isan-tsokajiny, ary mbola hitohy manerana ny faritra Menabe izany. Anisan’ireo voakasiky ny fakan-kevitra ny any Belo sur Tsiribihina, izay ahitana tranga mampiady hevitra momba ny fanajana ny fady eny amin’ny reniranon’i Tsiribihina.

Fantatra mantsy fa araka ny fomba sy finoana nentin-drazana ao an-toerana dia isan’ny fady eny amin’io renirano io ny kisoa. Voarara, araka izany, ny fampitana na fampandroana kisoa amin’ny ranon’i Tsiribihina. Na izany aza anefa dia hita amin’izao fotoana izao fa misy ny tsy fanajana izany fomba izany, ka lasa ampiasaina hitondrana sy hanasana kisoa mihitsy ny renirano.

Nohamafisin’ny Fitaleovam-paritry ny Serasera sy ny Kolontsaina Menabe fa hisy aloha ny fifampidinihana sy ny fakan-kevitra miaraka amin’ireo raiamandreny ara-drazana sy tompon’andraikitra eny ifotony, ary aorian’izay vao handraisana ireo fepetra mifanaraka amin’ny zava-misy sy ny fanajana ny hasin’ny tany.

Tsiahivina fa ny fady sy ny fomba amam-panao dia anisan’ny vakoka ara-kolontsaina Malagasy, ka ny fiarovana sy fampitana izany amin’ny taranaka faramandimby dia adidy iombonana. Ho an’i Menabe manokana, dia heverina ho antoky ny firaisankina sy ny fitandroana ny maha-izy azy ny fanajana ireo soatoavina nentin-drazana.