𝗠𝗢𝗥𝗢𝗡𝗗𝗔𝗩𝗔 : 𝗡𝗜𝗔𝗩𝗔𝗞𝗔 𝗡𝗬 𝗙𝗔𝗡𝗞𝗔𝗟𝗔𝗭𝗔𝗡𝗔 𝗡𝗬 𝗔𝗡𝗗𝗥𝗢 𝗜𝗥𝗔𝗜𝗦𝗔𝗠-𝗣𝗜𝗥𝗘𝗡𝗘𝗡𝗔 𝗛𝗢 𝗔𝗡’𝗡𝗬 𝗖𝗥𝗢𝗜𝗫-𝗥𝗢𝗨𝗚𝗘

Notanterahina tamim-pomba miavaka teto Morondava androany 8 Mai ny fankalazana ny Andro isaisam-pirenena ho an’i Croix-rouge sy Croissant rouge. Hetsika lehibe nampivondrona ireo mpikambana sy mpiasan’ny Croix-Rouge avy amin’ireo distrika maro manerana ny faritra Menabe izany.

Nosantarina tamin’ny filaharana lehibe namakivaky ny tanànan’i Morondava ny fotoana. Nandray anjara tamin’izany ireo delegasiona avy any Morondava, Belo Tsiribihy, Manja, Miandrivazo ary Mahabo. Niainga teo an-tampon-tanàna ny diabe ary nifarana tao amin’ny foiben-toeran’ny Croix-Rouge Morondava, toerana nanaovana ny lanonana ofisialy.

Nifandimby nandray fitenenana nandritra ny fotoana ireo tompon’andraikitra isan-tsokajiny, nanasongadina ny maha-zava-dehibe ny asa fanasoavana sy ny andraikitra sahanin’ny Croix-Rouge eo amin’ny fiarahamonina, indrindra amin’ny lafiny vonjy voina sy fahasalamam-bahoaka.

Ankoatra ny lanonana dia nisy ihany koa ny hetsika fanentanana ara-pahasalamana sy fanatanterahana ny vaksiny hiadiana amin’ny aretina Nendran-drajako na “Mpox”, ho fiarovana ny fahasalaman’ny vahoaka.

Nanotrona sy nanome voninahitra ny hetsika manontolo Andriamatoa RAMBELOSON Achille Marius, Filoham-paritry ny Croix-Rouge, izay naneho ny fankasitrahany ireo mpikambana sy mpiara-miombon’antoka rehetra miezaka hatrany manatanteraka ny iraka maha-olona sy fanampiana ny sahirana.

Io fankalazana io dia mariky ny firaisankina sy ny finiavana hanohy ny asa maha-olona ho tombontsoan’ny fiarahamonina sy ny firenena.
✍️ RA PA