𝗙𝗔𝗠𝗜𝗡𝗗𝗥𝗔𝗡𝗔 𝗢𝗙𝗜𝗦𝗜𝗔𝗟𝗬 𝗡𝗬 𝗙𝗜𝗧𝗔𝗡𝗧𝗔𝗡𝗔𝗡𝗔 𝗡𝗬 𝗩𝗔𝗟𝗔𝗡-𝗝𝗔𝗩𝗔𝗕𝗢𝗔𝗛𝗔𝗥𝗬 𝗠𝗔𝗞𝗔𝗬 𝗘𝗢 𝗔𝗠𝗕𝗔𝗡𝗬 𝗙𝗜𝗔𝗛𝗜𝗔𝗡’𝗡𝗬 𝗠𝗔𝗗𝗔𝗚𝗔𝗦𝗖𝗔𝗥 𝗡𝗔𝗧𝗜𝗢𝗡𝗔𝗟 𝗣𝗔𝗥𝗞𝗦

Notanterahina tamin’ny fomba ofisialy tany Malaimbandy, ny 08 Mey 2026, ny fametrahana ny Madagascar National Parks (MNP) ho mpitantana ny Valan-javaboahary MAKAY, taorian’ny famoahan’ny Governemanta ny didim-pitondrana tamin’ny 04 Febroary 2026 mikasika ireo valan-javaboahary eto Madagasikara.

Ny fanapahan-kevitra laharana 137-26/MEDD/Mi nivoaka tamin’ny 04 Febroary 2026 avy amin’ny Ministeran’ny Tontolo Iainana sy ny Fandrosoana Lovain-jafy no nanome fankatoavana ofisialy ny hitantanan’ny MNP ny Valan-javaboahary MAKAY, izay miparitaka ao amin’ny Distrikan’i Mahabo, Faritra Menabe, sy ny Distrikan’i Beroroha, Faritra Atsimo Andrefana.

Tonga nanome voninahitra ity lanonana lehibe ity ny Minisitry ny Tontolo Iainana sy ny Fandrosoana Lovain-jafy ANDRIATSIHALA Nolave Luck Aristide, niaraka tamin’ny Lehiben’ny Faritra Menabe Lieutenant-Colonel AUNEZIFORT Philippe, ny Solombavambahoakan’i Madagasikara voafidy tany Benenitra izay sady Filohan’ny Komisiona misahana ny Tontolo Iainana eo anivon’ny Antenimierampirenena, ary ny Tale Jeneralin’ny MNP. Nanatrika izany ihany koa ireo delegasiona avy amin’ny Faritra Atsimo Andrefana sy ireo manam-pahefana sivily sy miaramila maro samihafa.

Nandritra ny fotoana dia nisy ihany koa ny fifanaovan-tsonia fiaraha-miasa teo amin’ny MNP sy ireo mpiara-miombon’antoka isan-karazany, ka isan’izany ny FIZAMA, Nature Evolution ary Tany Ifandovana, ho fanamafisana ny fiaraha-mientana amin’ny fitantanana sy fiarovana ny valan-javaboahary.

Anisan’ireo valan-javaboahary lehibe sy manan-danja eto Madagasikara ny MAKAY, ary laharana fahadimy amin’ireo valan-javaboahary maherin’ny 150 manerana ny Nosy. Manana sata manokana izy noho ny fisian’ireo ala mikitroka, harena voajanahary tsy manam-paharoa, ary zava-boary mampiavaka azy. Ahitana ihany koa ireo fasana Sakalava sy vakoka ara-kolontsaina sarobidy maneho ny tantara sy ny maha-izy azy ny faritra.

Araka ny fanazavana nataon’ny tompon’andraikitra, isan’ireo asa lehibe miandry ny MNP amin’izao fitantanana vaovao izao ny famaritana ny sarintany ofisialin’ny valan-javaboahary sy ny fanadihadiana ara-tontolo iainana hamantarana ireo zava-misy anatiny sy manodidina azy, izay kasaina ho tanterahina ao anatin’ny herintaona.

Tanjona lehibe amin’izao fitantanana vaovao izao ny hahatonga ny Valan-javaboahary MAKAY ho antoky ny fampandrosoana maharitra ho an’ireo vahoaka manodidina azy, indrindra amin’ny alalan’ny fizahantany maharitra sy ny fampiroboroboana ny toe-karena eny ifotony. Efa anatin’ny vina napetraky ny MNP ihany koa ny fanokafana ny lalam-pizahantany “TSINGY – MAKAY – ISALO”, izay antenaina hitondra fampandrosoana ara-toekarena sy hampisongadina bebe kokoa ny haren’i Madagasikara eo amin’ny sehatra iraisam-pirenena.

Nanao antso avo amin’ireo mponina manodidina ny valan-javaboahary ny tompon’andraikitra rehetra mba samy ho saro-piaro amin’ny fiarovana sy fikajiana ity harena voajanahary sy ara-kolontsaina ity, izay heverina ho lova sarobidy ho an’ny taranaka ankehitriny sy ny taranaka ho avy.

✍️ RA PA