𝗠𝗘𝗡𝗔𝗕𝗘: 𝗡𝗮𝗻𝗸𝗮𝗹𝗮𝘇𝗮 𝗻𝘆 𝗮𝗻𝗱𝗿𝗼 𝗺𝗮𝗻𝗲𝗿𝗮𝗻-𝘁𝗮𝗻𝘆 𝗵𝗼 𝗮𝗻’𝗻𝘆 𝗛𝗲́𝗺𝗼𝗽𝗵𝗶𝗹𝗶𝗲 𝘁𝗮𝗺𝗶𝗻’𝗻𝘆 𝗮𝗹𝗮𝗹𝗮𝗻’𝗻𝘆 𝗳𝗮𝗻𝗲𝗻𝘁𝗮𝗻𝗮𝗻𝗮 𝘀𝘆 𝗳𝗮𝗻𝗼𝗺𝗲𝘇𝗮𝗻𝗮 𝘁𝗼𝗹𝗼𝘁𝗿𝗮 𝗺𝗮𝗶𝗺𝗮𝗶𝗺-𝗽𝗼𝗮𝗻𝗮

Nankalazaina tamin’ny fomba ofisialy tao amin’ny kaominina ambanivohitra Analaiva ny andro maneran-tany ho an’ny fijininihan-drà lava (hémophilie), tamin’ny alalan’ny hetsika fanentanana sy fanomezana tolotra maimaim-poana notanterahin’ny ekipan’ny Fitaleovam-paritry ny Fahasalamam-bahoaka Menabe, niaraka tamin’ny EMAR sy EMAD  Morondava  ary ny ekipan’ny CHRR Namahora

Natao tao amin’ny biraon’ny kaominina sy tao amin’ny CSB II Analaiva ireo hetsika, ka nahitana fanazavana amin’ny antsipiriany momba ny aretina hémophilie, ny fomba isehoany ary ny fitsaboana azo atao. Ankoatra izany, nisy ihany koa ny fanentanana mikasika ny valanaretina MPOX, ny maha-zava-dehibe ny vaksiny fiarovana, ary ny fanentanana ny resaka fanapoizinana ara-tsakafo.

Nosafidiana manokana ny kaominina Analaiva noho izy efa nahitana tranga hémophilie taloha. Nifanojo tamin’ny andro tsena zoma ihany koa ny hetsika, ka nahafahan’ny olona avy amin’ny fokontany lavitra sy ireo kaominina manodidina nanatrika betsaka, na teo anivon’ny kaominina na tao amin’ny tobim-pahasalamana satria ny andro tsena dia manararaotra mamonjy toeram-pitsaboina ny olona.

Ny lohahevitra nanamarika ity fankalazana ity tamin’ity taona ity dia ny hoe: “Ny fitiliana no fiandohan’ny fitsaboana.”
Nitarika ny hetsika ny talem-paritry ny fahasalamam-bahoaka Menabe, Dr Jean Tsarahamba, izay nanasongadina ny maha-zava-dehibe ny fanentanana amin’ny fampahafantarana ny mponina momba ireo aretina sy ny fitsaboana tokony arahina.

Araka ny nambarany, tanjona lehibe ny hanakaiky hatrany ny vahoaka amin’ny tolotra ara-pahasalamana, ary ny hahatratrarana ny vina hoe “fahasalamana ho an’ny rehetra.”

Ity hetsika ity dia anisan’ny ezaka ataon’ny tompon’andraikitra ara-pahasalamana amin’ny fanamafisana ny fisorohana sy fitsaboana mialoha, indrindra ny tontolo ambanivohitra.

✍️RA PA