2 isanjaton’ny mponina no voan’ny « épilepsie » na androbe/toratorana/aretim-borona eto Madagasikara raha 50 tapitrisa manerantany. Samy hafa ny antony mahatonga io aretina io fa ny fitiliana no ahitana ny antony saingy matetika mifandray amin’ny loto tafiditra any anaty atidoha izany ho antsika aty amin’ny tany an-dalam-pandrosoana raha vokatry ny dona na fahanterana kosa ho an’ireo any amin’ny tany mandroso. Fahasimban’ny sela ao amin’ny ati-doha ny androbe , fiverimberenana fanintona amin’ny olona iray ka lasa aretina mitaiza; misy herinaratra mitranga tampoka ao anaty atidoha ka mahatonga ilay marary hanao fihetsika tsy fanahiniana toy ny fanintona ,mihikiaka, tsy mihetsika tampoka ,fianjerana amin’ny tany,…ka mandritra ny 55 segondra eo no itrangan’izany. Mbola maro ireo hevi-diso sy tsaho miparitaka manodidina ity aretina ity raha tsy ilaza afa-tsy ny filazana azy ho asan-devoly sy famosaviana hany ka tsy misitraka fitsaboana araka ny tokony ho izy ireo olona tratrany.Maro ihany koa ireo mihevitra azy ho areti-mifindra ka lasa iharan’ny fanilihana ireo olona voany ary raha sendra mitranga ilay aretina dia itsoahan’ny fiarahamonina.Azo tsaboina tsara anefa ny androbe sady tsy mifindra velively ; misy ireo fanafody natao ifehezana azy ka raha vao miseho ireo fambara momba ity aretina ity dia tokony manantona mpitsabo.Mila manana faharetana kosa ny fitsaboana ity aretina ity satria maharitraritra ny fanarahana fitsaboana na dia efa tsy miseho intsony aza ilay aretina , mety ho 3 taona hatramin’ny 5 taona eo na mihoatra izay. Andro manerantany ho an’ny aretina androbe omaly 10 febroary 2025 ka nisy ny famelabelaran-kevitra niresahana momba ity aretina ity teny amin’ny foiben-toeran’ny OJM Ambohidahy nokarakarain’ny REMAPSEN MADA, nanasana ny mpitsabo manam-pahaizana manokana momba ny androbe Dr Julien RAZAFIMAHEFA sy ny Dr Manitra RAKOTOARIVONY.
M.Elvina
