Taorian’ny tranga nahery vaika niseho tao Vohemar ny talata 14 aprily 2025, dia nanao fanambarana ofisialy ny Confederasiona Sendikaly ny Polisy Nasionaly androany atoandro. Naneho ny alahelony sy ny firaisankinany amin’ireo fianakaviana tra-doza izy ireo, indrindra ireo niharan’ny herisetra vokatry ny fihetsika nataon’ireo nahavanon-doza.
Ao anatin’izany fanambarana izany dia nanameloka mafy ny herisetra natao tamin’ireo Polisy teo am-panatanterahana ny asany ity Confederasiona Sendikaly ny Polisy Nasionaly ity ohamafisin’izy ireo fa tsy azo ekena velively ny fanohintohinana ireo mpitandro filaminana izay miasa araka ny lalàna sy ny andraikitra apetraka aminy. Notsikeraina mafy ihany koa ny fandoroana ny biraon’ny Polisy tao an-toerana, izay nofaritan’izy ireo ho fandravana mivantana ny rafitra iankinan’ny filaminam-bahoaka.
Nanentana ireo mpiaro ny zon’olombelona ny Confederasiona mba handinika akaiky ity toe-draharaha ity, sady nanamafy fa tsy tokony haverina intsony ny tranga tahaka izao. Nambarany fa tsy ekeny ny fisian’ny fanelingelenana na tsindry mandritra ny fanadihadiana, indrindra raha mety hanohintohina ny fahaleovantenan’ireo tompon’andraikitra amin’izany.
Farany, niantso ny fitsarana izy ireo handray andraikitra hentitra sy mifanaraka amin’ny lalàna, mba hahazoana antoka fa ho voasazy araka ny tokony ho izy ireo tompon’antoka, ary hiverina amin’ny laoniny ny filaminana.
Nangonin’ Lay Mahitsy
