𝐀𝐍𝐀𝐋𝐀𝐊𝐄𝐋𝐘 : 𝐌𝐀𝐍𝐀𝐑𝐀𝐑𝐀𝐎𝐓𝐑𝐀 𝐌𝐀𝐍𝐈𝐌𝐁𝐀 𝐍𝐘 𝐅𝐈𝐀𝐑𝐀 𝐌𝐈𝐉𝐀𝐍𝐎𝐍𝐀 𝐍𝐘 𝐒𝐀𝐒𝐀𝐍𝐘 𝐀𝐌𝐈𝐍’𝐈𝐑𝐄𝐎 𝐌𝐏𝐈𝐕𝐀𝐑𝐎-𝐌𝐀𝐍𝐃𝐄𝐇𝐀 𝐊𝐎𝐉𝐀𝐊𝐎𝐉𝐀 𝐅𝐈𝐀𝐑𝐀

Raha iny varina niantsena tao amin’ny Orange iny ny Tompon’ity fiara iray ity, dia nisy nanaraotra nanala ireo kojakoja sy haingony ivelan’ny fiarany, ary misy naman’io mpanimba io indray no mody manamboatra ny simba sy mametraka karazana kojakoja hafa, izay tsy teny ierana ary tsy nahazoana fankatoavana avy amin’ny tompony.

Hatairana sy hagagana tsy misy toy izany nony niverina ny tompon’ny fiara mahita ny fiarany nanjary nisy kojakoja izay tsy fantany velively ny niaviany. Eo no miditra antsehatra mandresy lahatra ireto Mpanararaotra ireto, ary tsy mandeha irery izy fa manao andiany, ka ny sasany mandresy lahatra ilay tompon’ny fiara mba hividy ireo kojakoja napetraka io, ny sasany mandrahona fa raha tsy hefaina ny vidiny dia hoendahiny ilay kojakoja samy hafa napetraka tamin’ny fiara.

Manaiky tsy sazoka ilay tompon’ny fiara, ary hatao ny adi-varotra, ireto mpanararaotra anefa dia manao ny sarany midangana, ka teo no nitranga ny olana, sy fifamaliana. Tratry ny be noho vitsy ireo Mpivady kely tompon’ny fiara, kanefa niezaka nifanazava, tamin’io fotoana io, dia nisy nampandre izahay eto anivon’ny FDM, ary tonga ara-potoana.

Fantatra fa efa nomena 120 000 Ar ireto mpanararotra ireto, ary maro nijoro vavolombelona fa nisy tokoa io fanomezana vola, fa tsy nanaiky izy ireo, kanefa, dia karazana fils kely sahabo 5cm napetrany tamin’ny fiara, ary nikasa ny handoro ny fiara mihintsy izy ireo, soa fa nisy Polisy iray niasa teny amin’ny manodidina ka tonga nandamina ny raharaha.

Araka ny filazan’ireo manodidina, dia efa fanaon’izy ireo ity karazana « fanararaotana hafakely » ity, ary misy aza voahambana antsy raha vao tsy manome izay vola lazain’izy ireo. Ambaranay moa fa ny Mpanao Gazety naka ny sary dia sady voahompan’izy ireo no mbola nanaovana fandrahonana ambava hatrany.

Koa miangavy an-tanan-droa ny tompon’andraikitra hijery ity fanararaotana hafakely ataonizy ireo ity fa miteraka savorovoro andaniny, fa ankilany kosa, manimba ny asan’ireo izay tena mivelona amin’ity asa manao varo-mandeha ity, hoy hatrany fangatahan’ireo manao izany asa izany.

𝗩𝗼𝗮𝗹𝗮𝘇𝗮 𝗳𝗮 𝘁𝘀𝘆 𝘀𝗮𝗵𝘆 𝗺𝗶𝘁𝗼𝗿𝗼𝗸𝗮 𝗮𝘇𝘆 𝗶𝗿𝗲𝗼 𝗻𝘆 𝗺𝗮𝗻𝗼𝗱𝗶𝗱𝗶𝗻𝗮 𝗺𝗮𝗵𝗶𝘁𝗮, 𝗳𝗮 𝗺𝗮𝘁𝗮𝗵𝗼𝘁𝗿𝗮 𝗻𝘆 𝘃𝗮𝗹𝗶𝗳𝗮𝘁𝘆.