𝐌𝐄𝐍𝐀𝐁𝐄 : 𝐍𝐈𝐒𝐎𝐊𝐀𝐓𝐑𝐀 𝐓𝐀𝐌𝐈𝐍’𝐍𝐘 𝐅𝐎𝐌𝐁𝐀 𝐎𝐅𝐈𝐒𝐈𝐀𝐋𝐘 𝐍𝐘 𝐅𝐀𝐍𝐊𝐀𝐍-𝐊𝐄𝐕𝐈𝐓𝐑𝐀 𝐌𝐎𝐌𝐁𝐀 𝐍𝐘 𝐅𝐀𝐍𝐀𝐍𝐀𝐍-𝐓𝐀𝐍𝐘 𝐒𝐘 𝐍𝐘 𝐅𝐀𝐍𝐉𝐀𝐑𝐈𝐀𝐍𝐀 𝐍𝐘 𝐓𝐀𝐍𝐘 𝐀𝐍𝐃𝐑𝐎𝐀𝐍𝐘

Nosokafana tamin’ny fomba ofisialy androany Alakamisy 23 Aprily 2026, tao amin’ny Salle d’œuvre Katolika Namahora, eto Morondava, ny fankan-kevitra isam-paritra mikasika ny fananan-tany, ny fanajariana ny tany ary ny toeram-ponenana ho an’ny Faritra Menabe.

Haharitra roa andro ity hetsika ity izay hanasana ireo sokajin’olona maro samihafa . Natokana ho an’ireo tompon’andraikim-panjakana, ireo rafitra sy fikambanana miankina sy tsy miankina amin’ny fanjakana ary ireo olobe an-tanana ny andro voalohany. Ho an’ny andro faharoa kosa dia hasaina handray anjara manokana ireo tanora, ny fikambanan’ny tanora ary ireo mpianatra, ho fampidirana ny feon’ny taranaka ho avy amin’ny fandrafetana politika sy paikady.

Araka ny nambaran’ny talemparitry ny fananan-tany, ny fanajariana ny tany ary ny toeram-ponenana RASEDIMAHEFA Tsimiebo , dia tanjona ny hanangona sy handrindra ireo hevitra avy amin’ny mpandray anjara rehetra ity fankan-kevitra ity. Ireo sosokevitra voaangona dia hoentina hanatsarana ny fitantanana ny fananan-tany, hanamafisana ny fanajariana ara-drafitra ny tany, ary hanatsarana ny fandrindrana ny toeram-ponenana manerana ny Faritra Menabe.

Zava-dehibe ity hetsika ity satria mifamatotra amin’ny fampandrosoana maharitra ny faritra ny fananan-tany sy ny fanajariana azy, indrindra eo anatrehan’ny fitomboan’ny mponina sy ny fanamby ara-tontolo iainana. Ny fanamafisana ny fifampidinihana toy izao dia heverina ho dingana iray lehibe mankany amin’ny fitantanana mangarahara sy mahomby kokoa ny loharanon-karena ara-tany.
Tonga nanome voninahitra izao fankan-kevitra izao moa ny lehiben’ny faritra mpisolon-toerana ary nanokatra ny fotoana tamin’ny fomba ofisialy kosa ny Préfet an’i Morondava.

Mitohy rahampitso ny hetsika, izay antenaina hitondra fijery vaovao avy amin’ny tanora sy ny mpianatra, ho fanamafisana ny vahaolana maharitra ho an’ny Faritra Menabe.
✍️ RA PA