𝐍𝐎𝐒𝐎𝐋𝐎𝐈𝐍𝐀 𝐇𝐎 𝐏𝐃𝐒 𝐍𝐎 𝐇𝐈𝐓𝐀𝐍𝐓𝐀𝐍𝐀 𝐍𝐘 𝐓𝐀𝐍𝐀𝐍𝐀 𝐍𝐘 𝐊𝐀𝐎𝐌𝐈𝐍𝐈𝐍𝐀 𝐒𝐀𝐁𝐎𝐓𝐒𝐘 𝐍𝐀𝐌𝐄𝐇𝐀𝐍𝐀

Nosoloina ho Delegasiona manokana na PDS no hitantana ny Tananan’ny Kaominina Sabotsy Namehana manomboka androany 18 Novambra 2024 ka io maraina io no natao ny fifamindram-pahefana teo amin’Andriamatoa RAKOTOARISOA Gabin, izay Ben’ny tanana Mpisolon-toerana sy Andriamatoa RANDRIAMANANJARA Andrianiaina, izay voatendry ho PDS,ary ireo Mpikambana mianadahy hiara-hiasa aminy.

Nandritran’ny kabary fohy teo amin’ny fifanaovan-tsonia, dia nohatitraterin’Andriamatoa PDS, izay vao notendren’ny Fanjakana, fa tsy marina velively ilay siosion-dresaka miely fa paipaik’ady Pôlitika, entina hampandresy ny antokon’ny fitondrana no nanendrena azy izao, fa tena fitohizan-draharaham-panjakana, satria ny asam-panjakana manakaiky ny vahoaka tahaka itony, dia tsy azo bangaina na inona antony na inona antony.

Ny fandaminana ny tsena no vain-dohan-draharaha ho sahany amin’izao handraisany ny fitondrana ny tanana izao, ankoatry ny fampandehanan-draharaha izay efa fanaon’ny Kaominina.

Nilaza ny solon-tenan’ny Mpiasa eto anivon’ny Kaominina Sabotsy Namehana, fa vonona hatrany amin’ny asa izay hatao, indrindra fa ho tombotsoa ambonin’ny vahoakan’ny Sabnam no katsahina.

Marihina fa hitsahatra amin’ny asany izy ireo, vantany vao mandray ny toerany ny Ben’ny Tanana voafidim-bahoaka amin’ny fotoan’androny.

Tonga nanome voninahitra izao fifamindram-pahefana izao ny Sefo Distrikan’Antananarivo Avaradrano, ireo tandroka aron’ny vozona eto ana-tanana, nahitana ny Zandarimariam-pirenena, ny Polisim-pirenena, ary ireo mpiara-miasa rehetra eto amin’ny Kaominina Sabotsy Namehana

Nangonin ‘Lay Mahitsy