𝐇Ô𝐏𝐈𝐓𝐀𝐋𝐘 𝐁𝐄 𝐀𝐌𝐁𝐀𝐓𝐎𝐁𝐎𝐄𝐍𝐘 | 𝐈𝐓𝐑𝐀𝐍𝐆𝐀𝐍𝐀 𝐓𝐒𝐘 𝐅𝐈𝐓𝐎𝐕𝐈𝐙𝐀𝐍-𝐊𝐄𝐕𝐈𝐓𝐑𝐀 𝐌𝐀𝐇𝐄𝐑𝐘 𝐕𝐀𝐈𝐊𝐀

Efa hatramin’ny taona 2013 no nisy ny tsy fifanarahana sy tsy fitovian-kevitra teo amin’i Ramatoa Dokotera Lusta, lehiben’ny Hôpitaly Be ao Ambatoboeny, sy ireo mpitsabo mpanampy ary dokoteran’ny toeram-pitsaboana sasany miara-miasa aminy.

Araka ny fanazavan’ireo mpitsabo, ny antony fototra nahatonga ny tsy fifanarahana dia ny fomba fitantanana sy ny fandehanan-draharaha tsy mifanaraka amin’ny fenitra tokony hanjakan’ny hopitaly lehibe. Nilaza izy ireo fa efa nisy hatrany ny fitarainana sy tsy fahafaliana mikasika ny fomba fitondran’ny Lehiben’ny hopitaly ny raharaha anatiny.

Nohamafisin’i Dokotera Christophe, solontenan’ny mpiasa ao amin’ny CHRD Ambatoboeny, fa misy faneriterena sy ramatahora ataon’ny Lehiben’ny Hôpitaly amin’ireo mpiasan’ny fahasalamana tsy mbola mpiasam-panjakana ka mampiteraka tahotra sy fihenjanana amin’ny asa andavanandro.

Nambaran’ireo mpitsabo ao amin’ny hopitaly fa mitohy ny fitokonana ataon’izy ireo nandritra ny telo andro misesy, ho fanehoan-kevitra amin’ny olana tsy voavaha hatramin’izao. Nilaza izy ireo fa hitohy ny hetsika mandra-pahitana ny fandraisan’andraikitra avy amin’ny manampahefana ambony.

Ireo mpitsabo dia mitaky ny fanesorana an’i Dr. Lusta amin’ny toerany amin’izao fotoana izao, ho fepetra hahafahana mamerina ny filaminana sy ny fifampitokisana ao amin’ny Hôpitaly Be Ambatoboeny.

FDM | Ambatoboeny

: Zandrikely Konka