𝐌𝐎𝐑𝐎𝐍𝐃𝐀𝐕𝐀: 𝐀𝐓𝐑𝐈𝐊𝐀𝐒𝐀𝐌-𝐏𝐀𝐑𝐈𝐓𝐑𝐀 𝐑𝐄𝐂𝐎𝐒 𝐌𝐈𝐊𝐀𝐒𝐈𝐊𝐀 𝐍𝐘 𝐅𝐈𝐀𝐑𝐎𝐕𝐀𝐍𝐀 𝐍𝐘 𝐌𝐎𝐑𝐎𝐍𝐓𝐒𝐈𝐑𝐀𝐊𝐀

✅Tontosaina eto Morondava, nanomboka androany faha 22 ka hatramin’ny 25 Jolay 2025 ao amin’ny Hôtel Laguna Beach, ny atrikasam-paritra karakarain’ny Commission de l’Océan Indien (COI) amin’ny alalan’ny tetikasa RECOS (Réilience des populations et des écosystèmes côtiers du Sud-Ouest de l’Océan Indien). Ity atrikasa ity dia mikendry ny fanaraha-maso sy fitantanana ny morontsiraka manoloana ny fiovaovan’ny toetr’andro, ary andraisan’ireo manampahaizana sy solontena avy amin’ny firenena dimy ato amin’ny faritra Ranomasimbe Indiana Atsimo Andrefana ahitana an’i Komoro, Madagasikara, Maorisy, La Réunion ary Seychelles anjara.

📌Araka ny fanazavan’i Andriamatoa Christophe Legrand, mpandrindra ny tetikasa RECOS, dia tanjona ny fanamafisana ny fahaizan’ny mponina sy ny tontolo voajanahary miatrika ny loza ateraky ny fiovaovan’ny toetr’andro sy ny fahasimban’ny morontsiraka ka “Miezaka izahay mampiditra vahaolana mifangaro amin’ny voajanahary sy fomba maharitra, ary hampiroborobo ny fiaraha-miasa ara-tsiantifika,” hoy izy.

▶️Notsindrian’ny Governoran’ny Menabe fa tena saro-pady ny morontsiraka eto Morondava amin’ny fidiran’ny rano sy ny fahasimban’ny tany ka “Mila mandray andraikitra miaraka isika, indrindra amin’ny fampahafantarana ny vahoaka sy fanentanana amin’ny fiarovana ny morontsiraka,” hoy izy.

👉Nanamafy izany  Andriamatoa Ihaja Rajaonarison, directeur de partenariat et relations institutionnel eo anivon’ny Ministeran’ny Fanajariana ny tany, fa “Ny angon-drakitra farany dia mampiseho fitomboan’ny fiantraikan’ny fiovaovan’ny toetr’andro amin’ny morontsiraka. Manantena izahay fa hitondra vahaolana maharitra ity atrikasa ity, indrindra amin’ny fisorohana ny fahapotehan’ny tany sy ny fanatsarana ny fomba fiarovana.”

♦️Ny tetikasa RECOS moa dia niatomboka tamin’ny 2022 ary haharitra hatramin’ny 2026 , izay tantanin’ny COI, miaraka amin’ny famatsiam-bola avy amin’ny AFD (Agence Française de Développement) sy ny FFEM (Fonds Français pour l’Environnement Mondial) , ary ny tanjony dia ny hanamafisana ny fahaizan’ny mponina manamorona ranomasina miatrika ny fiovaovan’ny toetr’andro, amin’ny fanatsarana ny serivisy ara-tontolo iainana omen’ny tontolo voajanahary.
Anisan’ny tanjon’ny tetikasa ny fanohanana tetikasa 13 ato amin’ny faritra COI, ka tafiditra ao anatin’izany ny tetikasa ato Menabe momba ny fiarovana ny mponina amin’ny fikorontanan’ny toetr’andro sy ny fahasimban’ny morontsiraka. Ity atrikasa ato Morondava ity dia tafiditra ao amin’ny sehatra ara-tsiantifika an’ny RECOS, ao anatin’ny vondrona iombonana faritra momba ny fanaraha-maso sy fitantanana ny morontsiraka.
Ny delegasiona Malagasy dia ahitana ny Ministeran’ny  Fanajariana ny tany, ny FTM, ny Oniversiten’Antananarivo, ny Komity faritra GIZC ato Menabe, ary koa ny Kaominina Morondava, Nosy Be ary Sainte Marie.

👉Tanjona amin’ity Atrikasa ity moa :
– Fifanakalozana traikefa momba ny fomba fitantanana ny morontsiraka
– Fizarana traikefa amin’ny ady amin’ny fiovaovan’ny toetr’andro sy ny risika eny amin’ny morontsiraka
– Fisainana vahaolana mifangaro sy voajanahary
– Fametrahana fototra ho an’ny rafitra fanaraha-maso iraisana sy mifanaraka amin’ny faritra
– Fanohanana ny fanatanterahana ny asa fanohanana eto  Morondava
– Fanamafisana ny fahaizan’ny mpisehatra eto an-toerana, anisan’izany ny komity faritra GIZC.
✍️RA PA
22/07/25