Efa ela no tsy nisy fampakarana ny karaman`ireo mpampianatra FRAM ao amin`ny CEG Tsaravony Marie Jeanne CISCO Mandritsara. Nanatanteraka fivoriam-be niarahana tamin`ny Ray amandrenin`ny mpianatra ny FRAM amin`ny sekoly ity androany zoma 27 septambra, nandinika ny fomba anatanterahana ny fampandehanan-draharaha anatiny. Nivoaka ny efi-trano fivoariana ny mpampianatra rehetra rehefa tsy afapo tamin`ny karama nifampiresahana. Efa nanao fangatahana tamin`ny filohan`ny Fikambanan`ny Ray amanadrenin`ny Mpianatra ireo Mpampianatra ny hanondrotana izany ary nanambara ny fahavononana hanefa adidy ny Ray amandreny. Ny fananganana trano fivoahana no laharam-pahamehana ao amin`ny sekoly amin`izao raha ny nambaran`ny filohan`ny Farimbon`ezaka ho fahombiazana sy fanabezana eny ifotony, Randrianatrehina. Ela vao tonga ampelatanan`ny FEFFI ny vola tohana avy amin`ny fanjakana ka tsy maintsy ampiasana ny vola avy amin`ny Ray amandrenin`ny mpianatra hoy izy hatrany. Ireto mpampianatra FRAM ankilany mitaraina fa miha mamely ny vidim-piainana amin`izao.
Tsy afapo amin`ny fampakarana tapaky ny biraon`ny FRAM ireo mpampianatra 9 mianadahy voakasika ka hitsahatra tsy hampianatra aloha. Manohana fitakiana ataon`izy ireo ny mpampianatra maro efa mpiasam-panjakana. Izy ireto izay mametraka ahiahiny mahakasika ny tsy fangaraharahn`ny fitantantana ataon`ny biraon`ny FRAM.
Mila mifanatona mandamin-dresaka araky ny fifanarahana natao ny FRAM sy ny mpampianatra karamain`izy ireo hoy ny lehiben`ny Fari-piadidiam-pampianarana Mandritsara, Indriantsiferana Radisson Zaralahy, raha naneho hevitra momba toe-draharaha ity rehefa nantsoin`ny mpanao gazetinay. Tsy misy idiran`ny CISCO ny raharahan`ny FRAM raha ny nambarany hatrany.
Nangonin`i Claudio
