𝐅𝐚𝐧𝐨𝐡𝐚𝐧𝐚𝐧𝐚 𝐧𝐲 𝐒𝐞𝐫𝐚𝐬𝐞𝐫𝐚: 𝐅𝐢𝐭𝐚𝐨𝐯𝐚𝐧𝐚 𝐯𝐚𝐨𝐯𝐚𝐨 𝐡𝐨 𝐚𝐧’𝐧𝐲 𝐡𝐚𝐢𝐧𝐨 𝐚𝐦𝐚𝐧-𝐣𝐞𝐫𝐲 𝐦𝐚𝐧𝐞𝐫𝐚𝐧𝐚 𝐚𝐧’𝐢 𝐌𝐚𝐝𝐚𝐠𝐚𝐬𝐢𝐤𝐚𝐫𝐚

Anisan’ny fitaovana noraisina androany ny solosaina avolenta, vata fahitalavitra, fakan-tsary mihetsika, ary “table de régie”, izay ho fanatsarana ny kalitaon’ny famokarana sy ny fandraisam-peo amin’ny endrika nomerika. Ramatoa Minisitry ny Serasera sy ny Kolontsaina, Mara Volamiranty Donna, no nandray izany tamin’ny fomba ofisialy.

Ireo fitaovana ireo dia vokatry ny fiaraha-miasa amin’ny Fiangonan’i Jesoa Kristy ho an’ny Olomasin’ny Andro Farany, izay nanolotra izany ho fanohanana ara-teknika sy ara-pitaovana ho an’ny haino aman-jerim-panjakana.

Ho an’ny fanapariahana mivelatra sy mitovy lenta, dia hisitraka izany ireo rantsa-mangaikan’ny minisitera manerana ny faritra. Nambaran’ny Minisitry ny Serasera sy ny Kolontsaina fa andrasana ihany koa ny fandraisana anjaran’ireo haino aman-jery tsy miankina, indrindra ireo mandray anjara mavitrika amin’ny sehatry ny fanabeazana, fahasalamana ary kolontsaina.

“Ezahina ny hanome lanja sy hanamafy ny fiaraha-miasa amin’ireo haino aman-jery rehetra miara-miombon’antoka amin’ny fanabeazana sy fampandrosoana ara-tsaina sy ara-kolontsaina eto Madagasikara,” hoy Ramatoa 𝐌𝐚𝐫𝐚 𝐕𝐨𝐥𝐚𝐦𝐢𝐫𝐚𝐧𝐭𝐲 𝐃𝐨𝐧𝐧𝐚 nanamafy.

: MSK