FIANARANTSOA : Akon’ny fanamarihana ny datin’ny 11 Febroary
Fahatsiarovana an’i Kolonely Richard Ratsimandrava sy Ireo Mpitandro Filaminana lavo am-perin’asa.
11 Febroary 1975 – 11 Febroary 2025: 50 Taona .
Ny 11 Febroary dia daty manan-danja ho an’ny tantaran’i Madagasikara. Andro natokana hanomezam-boninahitra an’i Kolonely Richard Ratsimandrava, Filoham-panjakana Malagasy, sy ireo mpitandro filaminana rehetra nanao fanompoana feno ho an’ny firenena.
Tao amin’ny Tobin’ny Zandarimariam-pirenena Tsaramandroso no natao ny lanonam-pahatsiarovana ny 50 taona nahafatesan’i Kolonely Richard Ratsimandrava. Nanotrona izany ny miaramila, zandary, polisy, ary ireo tompon’andraikim-panjakana avy ao amin’ny Faritra,ny Prefektiora, ary ny Kaominina Ambonivohitry Fianarantsoa, sy ireo FDS notarihin’Atoa Jeneraly ELIASY ANDRIANANDRASANOMENJANAHARY Jules Ducret sy Kolonely ANDRIANANTENAINA Honoré.
Tsiahy ny tantara: 11 Febroary 1975
Tamin’ny 11 Febroary 1975, nifarana tamin’ny fomba nahatsiravina ny fitondran’i Kolonely Richard Ratsimandrava, dimy andro monja taorian’ny naha-Filoham-panjakana azy. Voatifitra teny Ambohijatovo-Anjohy, Antananarivo, izy nohon’ny fahafoizany tena ho an’ny firenena. Tsaroana mandrakizay ilay teniny feno fahasahiana sy fitiavan-tanindrazana:
“Tsy miamboho adidy aho, Mon Général.” Mpanolo-tanana amin’ny fiarovana ny firenena.
Ho fahatsiarovana ny sorona nataon’i Kolonely Ratsimandrava sy ireo mpitandro filaminana maty am-perin’asa, dia notsariana manokana nandritra ny lanonana ireo zandary efatra (4)mirahalahy lavo nandritra ny taona 2024 teo , teto amin’ny Fari-piadidian’ny Zandarimariam-pirenena Fianarantsoa.
Ny mpitandro filaminana dia tsy miamboho adidy, mahafoy ny ainy ho an’ny tanindrazana, ary mitoetra ho andry fiarovana ny firenena sy ny vahoaka Malagasy.
Goverinoran’ny Faritra Matsiatra Ambony.
