📌 Azo lazaina koa hoe, fanomezan-tanana amin’ny asa atao ho an’ny mpiara-belona, itaomana ny mpiray tanana na Fikambanana, asa atao antsitra-po tsy misy tambiny. Tanterahina amin’ny karazana asa maro toa fananganana trano…
📌 Kolontsaina manana ny maha izy azy satria mamelona ny firaisankina sy fihavanana amin’ny fiarahamonina ny Fandriaka. Nanatanteraka izany i Iavizaka dite mama Evi, izay monina eto Mandritsara. Nitaona Fikambanam-behivavy mitotaly 25 izy ka nifarimbona nanetsa vary tetsy amin’ny lemak’i Andilana androany zoma 26 janoary 2024. Vehivavy 200 mahery no tonga namaly antso nandritra izany.
📌 Mahatsara ny Fandriaka ny fahainganan’ny fahavitan’ny asa noho ny fisian’ny firaisankina izay. Tanim-bary 1 hektara eo no nanaovana ny asa. Afapo ny tompon’ny asa teto ka nanolotra fisaorana mitafotafo ireo nanampy. Isany nanome tosika azy ireto ny filoham-boninahitry ny TMT (Tanoran’i Mandritsara Tompon’andraikitra) Rakoto Jean René, nanome lela-vola 100.000 Ar ny tenany nentin’ireo Fikambanana nanampiana ny kitapom-bola.
📌 Tanjona tamin’ny hetsika ity hamohafohana ny firaisankina amin’ny Fikambanam-behivavy anivon’ny fokontany amin’ny sahavavan’Andilana, Ambohibary, Adilambola… Hialana koa amin’ny fahazarana amin’ny fisian’ny asa misy tambiny (par jour) raha toa ka azo vitaina anatin’ny fotoana fohy izany amin’ny alalan’ny fanaovana Fandriaka.
🆔 Claudio
