𝐂𝐄𝐆 𝐀𝐦𝐛𝐨𝐥𝐨 𝐓𝐚𝐥𝐚𝐭𝐚 𝐕𝐨𝐥𝐨𝐧𝐨𝐧𝐝𝐫𝐲: 𝐞𝐟𝐢𝐭𝐫𝐚𝐧𝐨 𝐟𝐢𝐚𝐧𝐚𝐫𝐚𝐧𝐚 𝐯𝐚𝐨𝐯𝐚𝐨 𝐡𝐚𝐧𝐚𝐭𝐬𝐚𝐫𝐚𝐧𝐚 𝐧𝐲 𝐭𝐨𝐧𝐭𝐨𝐥𝐨𝐧’𝐧𝐲 𝐟𝐚𝐦𝐩𝐢𝐚𝐧𝐚𝐫𝐚𝐧𝐚

Notanterahina androany, Alakamisy 11 Jona 2026, ny lanonana ofisialy fanokanana ireo efitrano fianarana telo vaovao ao amin’ny CEG Ambolo, ao amin’ny Kaominina Ambanivohitra Talata Volonondry. Ireo fotodrafitrasa sy fampitaovana ireo dia fanohanana avy amin’ny Faritra Analamanga, izay tarihin-dRamatoa 𝐑𝐚𝐡𝐚𝐫𝐢𝐧𝐢𝐫𝐢𝐧𝐚 𝐂𝐥𝐞́𝐦𝐞𝐧𝐜𝐞, Lehiben’ny Faritra Analamanga, (mpisolo toerana.)

Tonga nanome voninahitra ny fotoana ny Solombavambahoaka voafidy tao amin’ny Distrikan’Antananarivo Avaradrano, Andriamatoa 𝐀𝐧𝐝𝐫𝐢𝐚𝐦𝐨𝐬𝐚 𝐀𝐯𝐨𝐭𝐫𝐚𝐢𝐧𝐚. Nandritra ny lahateny nataony, dia nanasongadina izy fa anisan’ny laharam-pahamehana amin’ny fampandrosoana ny fanabeazana ny fanitarana sy fanatsarana ny fotodrafitrasa eny anivon’ny sekoly.

Nambarany fa zava-dehibe ho an’ny ankizy Malagasy ny fisian’ny efitrano fianarana sahaza sy fitaovana manampy amin’ny asa fampianarana.

Naneho fisaorana ireo tompon’andraikitra sy mpanohana ny tetikasa izy, sady nanentana ny mpampiasa ny fotodrafitrasa mba hikajy sy hikojakoja izany, hahafahana mampiasa azy maharitra.

Andrasana fa hitondra ainga vaovao ho an’ny mpianatra sy ny mpampianatra ao amin’ny CEG Ambolo ny fisian’ireo efitrano vaovao ireo. Antenaina ihany koa fa hanatsara ny tontolon’ny fianarana sy hanampy amin’ny fanomezana fahafahana mitovy ho an’ireo ankizy eny ifotony izany.

Tsara marihina fa efa manana Ben’ny Tanàna vaovao ny Kaominina Ambanivohitra Talata Volonondry, taorian’ny nahafatesan’ny Ben’ny Tanàna teo aloha. Hoentina eto amin’ny gazety Feon’ny Demokrasia amin’ny fotoana manaraka ny antsipirihany mahakasika izany.

Ny fanokanana tahaka izao dia mampahatsiahy fa mbola mitana toerana lehibe amin’ny fampandrosoana ifotony ny fanabeazana.

Rehefa voakajy sy ampiasaina araka ny tokony ho izy ny fotodrafitrasa, dia afaka mitondra vokatra maharitra ho an’ny taranaka sy ny fiarahamonina.