Efa ho roa volana latsaka no niaina tao anaty tsy fahampian-drano ny mponin’i Port-Bergé. Ritra ny vovon-drano, simba ny milin’ny jirama. Misy ny rano fa tsy azo antoka ny fahadiovany.
Voatery maka rano any amin’ny 5 na 7km miala tanàna ireo izay manana fahafahana hanaovana izany. Mividy amin’ny 500 Ar ka hatramin’ny 1.000 Ariary iray bidao 20 litatra litatra kosa ho an’izay tsy manana fitaovana hitaomana rano sy tsy misy fotoana hakana azy.
Tapatapaka matetika koa ny jiro avy amin’ny orinasa Jirama. Tamin’ity herinandro ity dia nitsahatra tanteraka rahateo ny famatsiana ny herinaratra. Mbola tamin’ny alahady no nisitraka hazavana farany ny mponina. Etsy ankilany tsy mitsaha-miakatra ny hafanana ka tsy maintsy hisy hisotro rano avy nampangatsihiana (eau glacée).
1000 Ariary no vidin’izany raha iray litatra ary 2000 Ariary kosa raha iray litatra sy sasany. Ireo izay mampiasa angovo avy amin’ny herin’ny masoandro no mbola manana rano mangatsiaka amidy io.
Hita fa tsy zakan’ny vahoaka izao fahasahiranan mihoapampana izao fa tahaka ny mitomany any efitra izy ireo mitaraina. Ny rano koa tsy maintsy ilaina sotroina, anadiovana, idiovana ka alavirina ny saina aloha ny fieritreretana ny fahadioavana.
Nangonin’i Gabin Eloi
