𝐓𝐎𝐀𝐌𝐀𝐒𝐈𝐍𝐀 𝐅𝐀𝐇𝐀𝐑𝐎𝐀 — 𝐅𝐀𝐇𝐀𝐓𝐒𝐈𝐀𝐑𝐎𝐕𝐀𝐍𝐀 𝐍𝐘 𝟐𝟗 𝐌𝐀𝐑𝐓𝐒𝐀 𝟏𝟗𝟒𝟕 : 𝐅𝐀𝐍𝐊𝐀𝐋𝐀𝐙𝐀𝐍𝐀 𝐍𝐈𝐙𝐎𝐓𝐑𝐀 𝐀𝐌-𝐏𝐈𝐋𝐀𝐌𝐈𝐍𝐀𝐍𝐀 𝐓𝐀𝐍𝐘 𝐌𝐀𝐇𝐀𝐕𝐄𝐋𝐎𝐍𝐀 𝐅𝐎𝐔𝐋𝐏𝐎𝐈𝐍𝐓𝐄

Toy ny fanao isan-taona, nanomboka tamin’ny fametrahana fehezam-bonikazo teo amin’ny tsangam-baton’ny mahery fo ny lanonana, ho mariky ny fanajana sy ny fankasitrahana ireo razambe nanao sorona ny ainy ho an’ny firenena. Nandray anjara tamin’izany ireo tompon’andraiki-panjakana isan-tsokajiny, notarihin’ny Lehiben’ny Distrikan’i Toamasina Faharoa, Ramatoa Randrianarison Jessica Nancy, niaraka tamin’ireo manampahefana ara-panjakana sy ara-tafika ary ny solontenan’ny vahoaka.

Nandritra ny lahateniny, nanasongadina ny lanjan’ny fitadidiana ny tantara sy ny andraikitry ny taranaka ankehitriny amin’ny fitohizan’ny fanorenana firenena i Ramatoa Randrianarison Jessica Nancy. Nohamafisiny fa tsy tokony ho fahatsiarovana fotsiny ny 29 Martsa, fa tokony ho antso ho amin’ny firaisankina, ny fitiavan-tanindrazana ary ny fanoloran-tena amin’ny fampandrosoana maharitra.

Ankoatra izay, nisy ihany koa ny hetsika fanampiny nanamarihana ity andro manan-tantara ity, toy ny fotoam-bavaka sy ny fiaraha-mivavaka ho fahatsiarovana ireo lavo, ary koa ny hetsika ara-kolontsaina sy fanentanana natao ho an’ny tanora mba hampitana ny lova ara-tantara sy hanamafisana ny fahatsapana maha-olom-pirenena.

Marihina fa ny 29 Martsa 1947 dia isan’ireo pejy lehibe indrindra amin’ny tantaran’i Madagasikara, fotoana nanehoan’ny Malagasy ny herim-pony sy ny fitiavany tanindrazana teo anatrehan’ny fanjanahantany. Na dia maro aza ny aina nafoy sy ny fahoriana niseho, dia mitoetra ho fototra iorenan’ny fahaleovantenan’ny firenena sy ny maha-izy azy ny lova navelan’ireo mahery fo.

Amin’izao tsingerintaona faha-79 izao, dia mbola mitohy ny adidy sy andraikitry ny taranaka ankehitriny amin’ny fitandroana izany fahaleovantena izany, amin’ny alalan’ny asa sy ny finiavana hanandratra an’i Madagasikara.