Toamasina: Vehivavy miisa 15 no nisitraka fiofanana arak’asa mahakasika ny » Coupe et Couture » nandritran’ny 4 andro,tao amin’ny CFP Centre de Formation Professionnelle, eo anivon’ny Fitaleavam-paritry ny Fampianarana Teknika sy Fanofanana arak’asa.
Rehefa vita ny fiofanana dia omena milina fanjairana tsirairay avy iz’ireo mba ho afaka hiatrika asa avy hatrany. » Ny tanjona dia mba hanana fidiram-bola ka ho afaka tsikelikely amin’ny fiakinan-doha aman’olona ireo Renim-pianakaviana ireo. Notsongaina manokana iz’ireo satria fantatra fa niharan’ny herisetra ara-batana sy ara-bola,rehefa avy nandalo fanadihadiana teny anivon’ny BFP Brigade Féminine de Proximité. Izao hetsika izao dia tafiditra ao anatin’ny 16 andro iadiana amin’ny herisetra, ka ireo fitaovana ireo dia avy amin’ny Rtoa Mialy Rajoelina Vadin’Atoa Filoham-pirenena, izay Reny mpiahy an’io hetsika io » araka ny fanazavan’ny Kaomandin’ny BFP Toamasina Officier de Police Ramanamizaka Henriette.Nanambara kosa ny Talen’ny CFP, fa hisy hatrany tohana sy ny fanatevenana ny fahaiza-manao ho an’ireo vehivavy avy niatrika fiofanana ireo,mba ho tena matihanina amin’ny sehatry ny zaitra iz’ireo.
Nandalo nitsidika sy nirary soa ho an’ireo mpiofana ireo ny Commissaire Rakotondrainivonona Panoël Tsiky Commissaire Central de Toamasina ,niaraka tamin’ny Kaomandin’ny BFP.
Nangonin’i Claudia Tsitolomy Tena Izy
