𝗠𝗼𝗿𝗼𝗻𝗱𝗮𝘃𝗮 – 𝗙𝗮𝗻𝗮𝘇𝗮𝘃𝗮𝗻𝗮 𝗺𝗼𝗺𝗯𝗮 𝗻𝘆 𝗳𝗮𝗺𝗽𝗶𝗮𝘀𝗮𝗻𝗮 𝗸𝗮𝗼𝗻𝘁𝘆 𝗙𝗮𝗰𝗲𝗯𝗼𝗼𝗸 𝗮𝗻’𝗻𝘆 𝗺𝗽𝗮𝗻𝗮𝗻-𝗸𝗮𝗻𝘁𝗼 𝗶𝗿𝗮𝘆 𝗮𝗻𝘆 𝗮𝗺-𝗽𝗼𝗻𝗷𝗮

Niteraka resabe sy ahiahy teo anivon’ny olom-pirenena teto Morondava ny fahitana fa mbola manao publication hatrany ny kaonty Facebook an’ilay mpanankanto iray ampidirina am-ponja vonjimaika, raha toa ka fantatra fa voarara tanteraka ny fampiasana finday sy fitaovana fifandraisana ao anivon’ny Fonja.
Manoloana izany toe-javatra izany dia nandalo teny amin’ny Fonja Morondava ireo mpitory mba hitady fanazavana ofisialy sy hanamarina ny zava-misy.

Araka ny fanazavana nomen’ny tompon’andraikitry ny Fonja Morondava, dia efa natao ny fanamarinana ka fantatra fa olona akaiky azy ivelan’ny Fonja no nampiasa ilay kaonty Facebook-ny, ary efa nandraisana fepetra mifanaraka amin’izany. Nohamafisin’izy ireo ihany koa fa entitra ny fanarahamaso sy ny fitsirihana ao anivon’ny Fonja, ary tsy ekena mihitsy ny fampiasana fitaovana fifandraisana ao anatiny.
Nambaran’ny tompon’andraikitra fa raha misy fihetsika manitsakitsaka ny fitsipika mifehy ny Fonja, na avy amin’ny voafonja na avy amin’ny olona any ivelany, dia andraisana fepetra araky ny lalàna mifehy ny Fonja izany.
✍️ RA PA