SADC eto Madagasikara: Mihamafana ny adihevitra eo amin’ny fitondrana sy ireo mpanohitra

160 0

Niteraka resabe ara-politika indray ny fahafantarana fa eto Madagasikara no hampiantranoana ny fihaonambe faha-45 an’ny Vondrona SADC (Southern African Development Community), amin’ny volana Aogositra 2025. Raha tokony ho zava-dehibe ho an’ny firenena amin’ny resaka diplaomasia sy fandraisana andraikitra iraisam-pirenena izany, dia nisy kosa ny feo manohitra avy amin’ireo filoham-pirenena teo aloha, Marc Ravalomanana sy Hery Rajaonarimampianina.

Nandritra ny fanambarana nataon’izy ireo, nilaza mazava izy ireo fa tsy tokony ho tanterahina eto Madagasikara io fivoriana lehibe io, noho ny antony tsy nohazavainy tamin’ny an-tsipiriany.

Nanoloana izany, dia namaly an-karihary ny Minisitry ny Serasera sy ny Kolontsaina sady Mpitondra tenin’ny Governemanta, Ramatoa MARA Volamiranty Donna. Notsiahiviny fa efa nambaran’ny Praiminisitra Ntsay Christian fa misy endrika “populisme” ataon’ireo mpanohitra amin’izao fotoana izao, amin’ny fiezahany handresy lahatra vahoaka amin’ny alalan’ny fanoherana an-jambany.

« Tsy mikatsaka ny tombontsoam-bahoaka fa manosika korontana fotsiny no ataon’izy ireo, » hoy izy nanamafy. « Tsy azo lavina fa eo ambadiky ny fanoherana dia misy ihany koa ny fialonana ara-politika, satria Andriamatoa Andry Rajoelina, Filoha am-perinasa, no ho filohan’ny SADC manaraka. »

Nohamafisin’ny Minisitra MARA Donna fa hanaja sy hiaro hatrany ny filaminana sy ny fitoniana eto amin’ny firenena ny Fanjakana sy ny Governemanta, ary tsy hisy intsony, hoy izy, ny toerana ho an’ny korontana eto Madagasikara.

Tetikasa diplaomatika lehibe

Araka ny fanapahan-kevitra noraisina nandritra ny fihaonana farany nataon’ireo mpikambana ao amin’ny SADC tany Harare, renivohitr’i Zimbabwe, dia i Madagasikara no voatendry ho mpampiantrano ny fihaonambe faha-45. Amin’izany fotoana izany ihany koa no hanoloran’Andriamatoa Cyril Ramaphosa, Filoha Afrikanina Tatsimo, ny fahefana amin’ny fomba ofisialy ho an’i Andry Rajoelina, Filohan’ny Repoblika Malagasy, amin’ny maha Filohan’ny SADC azy mandritra ny fe-potoana manaraka.

Anisan’ny ho tanterahina amin’io fotoana io ny lanonana fifamindram-pahefana, ny fivoriana ara-teknika sy ara-politika, ary ny fametrahana ny vina vaovao ho an’ny firenena mpikambana.

Nangonin’i Bevomaso

Related Post

Voapetraka ny taratasin’ny Fandrava

Posted by - avril 7, 2024 0
𝐃𝐈𝐒𝐓𝐑𝐈𝐊𝐀𝐍’𝐀𝐌𝐁𝐎𝐒𝐈𝐓𝐑𝐀 |𝐓𝐚𝐟𝐚𝐩𝐞𝐭𝐫𝐚𝐤𝐚 𝐧𝐲 𝐭𝐚𝐫𝐚𝐭𝐚𝐬𝐲 𝐟𝐢𝐥𝐚𝐧𝐭𝐬𝐚𝐡𝐚𝐧-𝐤𝐨𝐟𝐢𝐝𝐢𝐚𝐧’𝐢 𝐅𝐀𝐍𝐃𝐑𝐀𝐕𝐀 — Anio Alahady 7 Avril 2024 (11h50) Tafapetraka ny atoandro teo ny taratasy filatsahan-kofidiana…