Sekolim-panjakana mitazona laharana voalohany amin’ny fahambonian’ny taham-pahafahana amin’ny valim-panadinana CEPE eo anivon’ny ZAP Maevaranohely ny ao amin’ny EPP Ankoby I, 80km mahery miala an’i Port-Bergé. Trano ahitana efitra roa ihany no ananan’ity toeram-panovozana fahalalana sy fanabeazana ity hatramin’izay.
Mampalahahelo anefa dia natsahatra nianatra avokoa ireo ankizy mpianatra ao amin’ny EPP Ankoby ity nanomboka tamin’ny volana Desambra 2023. Narodan’ny andro ratsy nisy rivotra mahery ny efitrano fianarana. Hatramin’izao volana Aprily 2024 izao dia tsy mbola tafaverina an-tSekoly izy ireo satria tsy mbola nisy fanamboarana ny trano fianarana.
Nitaraina tamin’ny tompon’andraikitra ireo Ray aman-dRenin’ny mpianatra, nanao tatitra tamin’ny ambaratongan-tsehatra ny mpitantana sekoly, araka ny fanazavana voaray. Nanamafy an’izany izy ireo nandritra ny fandalovan’ny mpanao gazety tany an-toerana androany zoma 12 Aprily.
Gabin Eloi
