𝐅𝐚𝐦𝐢𝐧𝐝𝐫𝐚𝐦-𝐩𝐢𝐭𝐚𝐧𝐭𝐚𝐧𝐚𝐧𝐚 𝐭𝐞𝐨 𝐚𝐧𝐢𝐯𝐨𝐧’𝐧𝐲 𝐌𝐢𝐧𝐢𝐬𝐢𝐭𝐞𝐫𝐚𝐧’𝐧𝐲 𝐅𝐢𝐭𝐚𝐭𝐞𝐫𝐚𝐧𝐚

Tsy niandry ela ny famindram-pitantanana taorian’ny fanesorana tampoka an’i Ramonjavelo Valéry, minisitry ny Fitaterana teo aloha Ny alin’ny 29 Jolay 2025 no nivoaka tamin’ny fomba ôfisialy ny didim-panjakana nanala azy tamin’ny toerany.

Tsy mbola nambaran’ny manampahefana mazava hatreto ny antony nahatonga izany fanapahan-kevitra tampoka izany.

Anio Alarobia 30 Jolay ihany, dia notanterahina ny fanolorana sy fandraisana andraikitra, izay notarihin’ny Praiminisitra Ntsay Christian.

Izy ihany koa no mandray vonjimaika ny fitantanana mivantana ny minisiteran’ny Fitaterana — sehatra stratejika mandrindra ny fifamoivoizana an-tanety, an-dranomasina ary an’habakabaka, sady miandraikitra ny fanaraha-maso ny toetrandro sy ny vinavina ara-potoana.

Araka ny loharanom-baovao avy eo anivon’ny Primatiora, « tanjona voalohany amin’izao famindram-pitantanana izao ny fametrahana fitoniana, ny fanohizana ny asa stratejika efa natomboka, ary ny fanamafisana ny fahaiza-mitantana, indrindra ao anatin’izao vanim-potoana ahitana adidy maro goavana ho an’ny governemanta izao. »

Miandry ny fanendrena amin’ny fomba ôfisialy ny minisitra vaovao hitondra tanteraka ity sampandraharaham-panjakana lehibe sy manan-danja ho an’ny firenena ity ny mpanara-baovao