*** Hindramina manokana amin’i TSILA ity Tonon-kalo ity ***
….๐๐๐ง๐ฆ๐๐๐ ๐๐ข๐ง๐ฆ๐ฌ
Lasalasa teo ny saiko , Maka rivotra eto an’dRova
Mety anjara ve ny antsika raha nitovy fombafomba?
Zary toa mahavalalanina ny fizotran’ny tantara
Misy tiana fa tsy tia , ny Samy tia nefa tsy anjara
.
Mitanondrika aho mahatsiaro , iza nefa no omen-tsiny
Ny ahy fitia adaladala , napetraka amin’ny mpivahiny
Nino loatra ny fitia ka tsy nisaina izany mihitsy
Ny ho vadiana hono Maro , ny ho rafozanina no tsisy
.
Misy zavatra hahatsiarovako ny feonao mandrotsirotsy
Tranga teny Ambohijatovo io tamin’ilay hetsika fotsy
Izaho mpanoratra mitolona , sady koa tomady tsara
Vonombonona eny foana ,vao tolona ho an’ny Gasikara
.
Poa,poa ,hoy ny feo tsisy intsony andraso andraso
Nirefodrefotra ny baomba mampandatsa-dranomaso
Nisavoritaka ny mpioko , namonjy ny elakelan-trano
Dia iny ianao nanatona ahy ,nanolotra tavoangin-drano
.
Sepotsepotra aho nandady , saika torana avy hatrany
Sao dia lemana ny maso hoy ianao Raha nanontany
Izaho jambena tsy mahita , ny feonao mirokoroko
Olona tsy haiko akory fa dia nidoboka ny foko
.
Ary teo no fanombohan’ilay tantarantsika roa
Tolona ho an’ny tanindrazana , isika koa nafana fo
Nandamoaka moa ny kiry, tsisy vokany ny vita
Saingy iny tolona iny no nampisy ny amintsika
.
Eto indray aho lasa saina , sady makamaka toky
Mety ho nisy ve ny antsika, raha tsy nisy HETSIKA FOTSY ?
Nosoratan’i TSILA
