𝐀𝐧𝐭𝐬𝐢𝐫𝐚𝐛𝐞 : 𝐎𝐥𝐨𝐧𝐚 𝐦𝐚𝐫𝐨𝐦𝐚𝐫𝐨 𝐦𝐢𝐭𝐚𝐤𝐲 𝐧𝐲 𝐟𝐚𝐦𝐨𝐭𝐬𝐨𝐫𝐚𝐧𝐚 𝐭𝐨𝐯𝐨𝐥𝐚𝐡𝐲 𝐢𝐫𝐚𝐲 𝐯𝐨𝐚𝐭𝐚𝐳𝐨𝐧𝐚 𝐚𝐨 𝐚𝐦𝐢𝐧’𝐧𝐲 𝐤𝐚𝐨𝐦𝐢𝐬𝐚𝐫𝐢𝐚𝐧’𝐧𝐲 𝐩𝐨𝐥𝐢𝐬𝐲

Nanao fihetsiketsehana teo anoloan’ny biraon’ny kaomisarian’ny polisy ao Antsirabe ny olona maromaro avy ao amin’ny fokontany Andafy, atsimon’ny orinasa STAR, ho fitakiana ny famotsorana tovolahy iray naman’izy ireo, izay voalaza fa tazonin’ny mpitandro filaminana.

Araka ny vaovao voaray, nivory teo anoloan’ny biraon’ny polisy ireo olona ireo, nitaky ny hamoahana ilay tovolahy. Voalaza fa mifandray amin’ny raharaha iray tao amin’ny toerana antsoina hoe « Autruche Antsirabe » ny antony nitazonana azy, saingy mbola tsy nisy fanazavana ofisialy amin’ny antsipiriany momba izany hatreto.

Tazana nihatrana teo anoloan’ny vavahadin’ny kaomisaria ihany koa ireo mpitandro filaminana. Natao izany, araka ny voalaza, ho fitandroana ny filaminana sy ho fisorohana ny mety hisian’ny korontana eo amin’ny manodidina.

Tsy mbola fantatra mazava ny fepetra ara-pitsarana mihatra amin’ilay tovolahy, na ny vesatra mety anenjehana azy. Noho izany, hajaina hatrany ny fiheverana azy ho tsy manan-tsiny, mandra-pivoakan’ny fanapahan-kevitra ara-dalàna.

Mbola andrasana ny fanazavana ofisialy avy amin’ny tompon’andraikitry ny polisy momba ny antony nitazonana azy sy ny tohin’ny raharaha.

Nangonin’i Haintsoa – Antsirabe