𝐅𝐈.𝐌𝐏𝐈.𝐌𝐀. 𝐀𝐧𝐭𝐚𝐧𝐚𝐧𝐚𝐫𝐢𝐯𝐨: 𝐦𝐩𝐢𝐤𝐚𝐛𝐚𝐫𝐲 𝐯𝐚𝐨𝐯𝐚𝐨 𝟖𝟕𝟑 𝐧𝐚𝐡𝐚𝐳𝐨 𝐟𝐢𝐨𝐟𝐚𝐧𝐚𝐧𝐚 𝐬𝐲 𝐧𝐢𝐝𝐢𝐭𝐫𝐚 𝐭𝐚𝐦𝐢𝐧’𝐧𝐲 𝐬𝐞𝐡𝐚𝐭𝐫𝐚 𝐦𝐚𝐭𝐢𝐡𝐚𝐧𝐢𝐧𝐚

Mpikabary vaovao miisa 873, ao anatin’ny andiany “ENI-MANGAMANGA”, no navoaka tamin’ny fomba ofisialy androany teny amin’ny Kianja Maitso Analamahitsy. Izy ireo dia avy amin’ny FI.MPI.MA. Faritany Antananarivo, izay ivondronan’ny faritra Analamanga, Bongolava ary Itasy.

Notanterahina teny amin’ny Kianja Maitso Analamahitsy ny lanonana famoahana ireo mpianatra nahavita fiofanana momba ny kabary malagasy teo anivon’ny Fikambanan’ny Mpikabary Malagasy — FI.MPI.MA. Faritany Antananarivo.

Miisa 873 mianadahy ireo mpikabary vaovao ao amin’ny andiany “ENI-MANGAMANGA”. Manomboka izao dia antenaina handray anjara amin’ny fampitana sy ny fampiroboroboana ny kabary, ny kolontsaina ary ny soatoavina malagasy eny anivon’ny fiarahamonina izy ireo.

𝙉𝙚𝙣𝙩𝙖𝙣𝙞𝙣𝙖 𝙝𝙤 𝙛𝙞𝙩𝙖𝙧𝙖𝙩𝙧𝙮 𝙣𝙮 𝙛𝙞𝙖𝙧𝙖𝙝𝙖𝙢𝙤𝙣𝙞𝙣𝙖

Nanatrika sy nitarika ny lanonana ny Minisitry ny Serasera sy ny Kolontsaina, GASCAR Fenosoa. Nandritra ny lahateniny dia nanantitrantitra izy fa tsy voafetra amin’ny fahaizana miteny eo anatrehan’ny olona ihany ny andraikitry ny mpikabary, fa mitaky fahamendrehana sy fitondran-tena mendrika ihany koa.

« Aoka ho modely amin’ny rehetra isika mpikabary, na amin’ny fitafy fotsiny aza. Hiditra amin’ny sehatra matihanina ianareo manomboka androany », hoy izy.

Nampahatsiahivin’ny minisitra tamin’izany fa ny mpikabary dia matetika raisina ho fitaratra sy mpampita hafatra eo anivon’ny fiarahamonina. Noho izany, ilaina ny fanajana ny teny ampiasaina, ny fomba fitafy, ny fihetsika ary ny hasin’ny lanonana anatanterahana ny kabary.

𝗧𝘀𝗼-𝗱𝗿𝗮𝗻𝗼 𝗮𝘃𝘆 𝗮𝗺𝗶𝗻’𝗻𝘆 𝗕𝗶𝗿𝗮𝗼 𝗙𝗼𝗶𝗯𝗲

Nanome voninahitra ny fotoana ihany koa ireo solontenan’ny Birao Foiben’ny FI.MPI.MA., notarihin’ny filoha maneran-tany, Ramatoa Hanitra ANDRIAMBOAVONJY.

Niarahaba ireo mpianatra nahavita fiofanana izy ireo ary nanome tso-drano azy ireo amin’ny andraikitra vaovao miandry azy eo amin’ny sehatry ny kabary. Notsindriana nandritra ny lanonana fa manana anjara toerana lehibe amin’ny fiarovana sy fampitana ny vakoka ara-kolontsaina malagasy ny mpikabary.

Araka ny fanazavana nampitaina nandritra ny fotoana, ankoatra ny fisian’ny FI.MPI.MA. amin’ireo faritra maro eto Madagasikara, dia efa misy mpikambana sy rafitra mifandray aminy any amin’ny firenena manodidina ny 30.

𝗠𝗶𝘀𝗼𝗸𝗮𝘁𝗿𝗮 𝗵𝗼 𝗮𝗻’𝗻𝘆 𝘃𝗲𝗵𝗶𝘃𝗮𝘃𝘆 𝘀𝘆 𝗻𝘆 𝗹𝗲𝗵𝗶𝗹𝗮𝗵𝘆

Tsy misy fanavahana ny lahy sy ny vavy amin’ny fianarana sy ny fanatanterahana ny kabary malagasy. Samy afaka mirotsaka amin’izany ireo liana, raha vonona hanaraka fiofanana sy hanaja ny fenitra ary ny soatoavina ijoroan’ny fikambanana.

Ny mpikabary dia manana andraikitra amin’ny fotoana maro eo amin’ny fiainan’ny Malagasy. Antsoina izy ireo amin’ny lanonana ara-pianakaviana sy ara-tsosialy, toy ny fangataham-bady, fanambadiana, famadihana ary fankalazana samihafa. Manana toerana lehibe ihany koa izy ireo amin’ny fotoam-pahoriana, indrindra amin’ny fampiononana sy ny fandrindrana ny fandraisam-pitenenana mandritra ny fahafatesana.

𝗞𝗮𝗯𝗮𝗿𝘆 𝘃𝗲𝗹𝗼𝗻𝗮, 𝗸𝗼𝗹𝗼𝗻𝘁𝘀𝗮𝗶𝗻𝗮 𝘃𝗼𝗮𝘁𝗮𝗵𝗶𝗿𝘆

Ny famoahana mpikabary vaovao 873 dia maneho ny fitohizan’ny ezaka amin’ny fampitana ny kabary amin’ny taranaka vaovao. Ankoatra ny maha-zavakanto am-bava azy, ny kabary dia fitaovana iray mitahiry ny teny, ny fomba fisainana, ny fihavanana ary ny maha-Malagasy.

Ny fanamby miandry ireo mpikabary vaovao dia ny hampifanaraka izany vakoka izany amin’ny fiainana ankehitriny, sady mitazona ny fahamendrehana, ny fanajana ary ny hasin’ny teny malagasy.