𝐅𝐚𝐧𝐚𝐦𝐛𝐚𝐫𝐚̀𝐦-𝐩𝐚𝐧𝐚𝐧𝐚𝐧𝐚 : 𝐝𝐢𝐧𝐠𝐚𝐧𝐚 𝐦𝐚𝐧𝐤𝐚𝐧𝐲 𝐚𝐦𝐢𝐧’𝐧𝐲 𝐦𝐚𝐧𝐠𝐚𝐫𝐚𝐡𝐚𝐫𝐚 | 𝐌𝐢𝐭𝐚𝐫𝐢𝐤𝐚 𝐨𝐡𝐚𝐭𝐫𝐚 𝐧𝐲 𝐌𝐢𝐧𝐢𝐬𝐢𝐭𝐫𝐚 𝐆𝐚𝐬𝐜𝐚𝐫 𝐅𝐞𝐧𝐨𝐬𝐨𝐚

Araka ny fanazavana voaray, ity fandraisana andraikitra ity dia tsy voafetra amin’ny fanarahana fotsiny ny fepetra ara-dalàna, fa mikendry indrindra ny hametrahana kolontsain’ny mangarahara sy ny tamberin’andraikitra ho fototry ny fitantanana. Ny fanambaràm-pananana dia anisan’ireo fitaovana heverina ho manan-danja amin’ny fisorohana ny kolikoly sy amin’ny fanamafisana ny fitokisan’ny olompirenena amin’ny rafi-panjakana.

Nandritra ny fitsidihana ara-pomba fanajana nataon’ny Tale Jeneralin’ny BIANCO, Razakamanantsoa Gaby Nestor, tao amin’ny biraon’ny Minisitra ao Nanisana, no nifampizarana hevitra momba ny paikady iarahana manatanteraka izany. Voaresaka manokana ny anjara asan’ny serasera amin’ny fanabeazana sy fanentanana ny vahoaka, satria ny ady amin’ny kolikoly dia tsy raharahan’andrim-panjakana irery, fa andraikitry ny fiarahamonina iray manontolo.

Naneho fahavononana mazava ny Minisitra amin’ny fanamafisana ny fiaraha-miasa amin’ny BIANCO, ary nanentana ireo tomponandraikitra isan-tsokajiny mba handray anjara mavitrika amin’ny fametrahana rafitra madio sy azo antoka. Ny tanjona dia iray: fametrahana fitantanana mendrika, manaja lalàna ary miorina amin’ny fahamarinana.

Ao anatin’ny toe-draharaha itadiavan’ny vahoaka fahatokisana sy mangarahara bebe kokoa amin’ny raharaham-panjakana, dia heverina ho dingana manan-danja ity hetsika ity. Raha te hanorina rafitra matanjaka sy maharitra ny firenena, hoy ny mpandinika, dia tsy maintsy miainga amin’ny fahadiovan’ny fitantanana sy ny ohatra asehon’ireo tomponandraikitra ambony izany.

Nangonin’i Bevomaso

: MSK