FIER-MADA 2025 – Andiany faha-26 : Ambatovy manohana hatrany ny tanora mpandraharaha sy ny tantsaha eny ifotony
Nanamarika indray ny fandraisany anjara amin’ny FIER-MADA 2025 ny Orinasa Ambatovy tamin’ny alalan’ny fanohanana ara-teknika sy ara-barotra ho an’ireo vondrona tantsaha sy tanora mpandraharaha mivelona manodidina ny faritra iasan’ny orinasa. Mpikambana folo avy amin’ireo fikambanana tantsaha ao Moramanga, Brickaville ary Toamasina no nanatrika ity hetsika goavana natao tetsy amin’ny Kianjan’ny Makis Andohatapenaka ity.
Fanohanana lavitrezaka ho an’ny fivelomana maharitra
Araka ny fanazavan’ny Tale Serasera ao amin’ny Ambatovy, Ramatoa Vony RAMAHALEO, dia tsy vitan’ny manome sehatra ho an’ireo mpamokatra amin’ny fitadiavana tsena vaovao ny orinasa fa manampy azy ireo ihany koa amin’ny lafiny ara-teknika, ara-pitaovana sy ara-pitantanana. “Manohana ny fanatsarana kalitao sy fifaninanana eo amin’ny tsena izahay, mba hahafahan’ireo tantsaha manitatra ny vokatra eny ifotony, amin’ny sehatra nasionaly ary manantena ihany koa mba hisehatra amin’ny tsena iraisam-pirenena”, hoy izy.
Ampahany amin’izany ny fanohanana ny rafitra tahiry sy fampindramam-bola eny ifotony toy ny VSLA (Village Saving and Loan Association), izay manamora ny fametrahana tetikasa madinika sy fanitarana ny asa.
Vavolombelona avy eny ifotony
Nohamafisin’i Raharimandimby Félice, filohan’ny fikambanana iray ao amin’ny fokontany Ambodibonara, Kaominina Fanandrahana, fa “nahita fivoarana sy fahombiazana amin’ny varotra sy fivelarana amin’ny tsena lavitra izahay noho ny fanohanana avy amin’Ambatovy. Efa tonga aza ny mpividy avy amin’ny faritra hafa haka ny vokatra toy ny voankazo sy zanakazo manatsara ny tontolo iainana.”
Tombontsoa mivaingana sy vina lavitra
Amin’izao fotoana izao dia 97 vondrona avy amin’ireo faritra telo no misitraka an’ity fanohanana ity, ahitana mpikambana 2 552, izay 70% amin’izy ireo dia vehivavy.
Lohahevitra manandanja amin’ny FIER-MADA 2025
Nisongadina tamin’ity andiany faha-26 ity ny lohahevitra “Apetaka eny amin’ny tsenan’ny kaominina ireo lalam-barotra anatiny sy ivelany ho fampivelarana ny famokarana eny ambanivohitra”. Nampahatsiahivin’ny Injeniera Jacques RAMANANTSOA, mpikarakara ny FIER-MADA, fa antoky ny fandrosoana sy ny fialana amin’ny fahantrana ny fahafahan’ny tantsaha miditra amin’ny tsena, ary ilaina amin’izany ny fanohanana amin’ny fahaiza-mitantam-bola sy fanentanana ara-barotra, indrindra ho an’ireo tsy ampy fahaizana fototra.
Nangonin’i Juanita RAKOTOARIVAO
