𝐈𝐕𝐎𝐓𝐎𝐑𝐎, 𝟑𝟏 𝐌𝐚𝐫𝐭𝐬𝐚 𝟐𝟎𝟐𝟔 — 𝐅𝐀𝐍𝐀𝐕𝐀𝐎𝐙𝐀𝐍𝐀 𝐍𝐘 𝐒𝐄𝐇𝐀𝐓𝐑𝐘 𝐍𝐘 𝐒𝐄𝐑𝐀𝐒𝐄𝐑𝐀 : 𝐌𝐈𝐑𝐎𝐒𝐎 𝐀𝐌𝐈𝐍’𝐍𝐘 𝐅𝐀𝐍𝐃𝐑𝐀𝐕𝐎𝐍𝐀𝐍𝐀 𝐍𝐘 𝐇𝐄𝐕𝐈-𝐃𝐄𝐇𝐈𝐁𝐄 𝐍𝐘 𝐌𝐈𝐍𝐈𝐒𝐈𝐓𝐄𝐑𝐀

Ity dingana ity dia manamarika fivoarana lehibe amin’ny fanatsarana ny tontolon’ny serasera, izay kendrena ho mifanaraka amin’ny zava-misy ankehitriny sy ny fivoaran’ny teknolojia, sady miantoka ny fahalalahana maneho hevitra sy ny asa fanaovan-gazety malalaka sy tompon’andraikitra.

𝗙𝗮𝗸𝗮𝗻-𝗸𝗲𝘃𝗶𝘁𝗿𝗮 𝗶𝘀𝗮𝗺-𝗽𝗮𝗿𝗶𝘁𝗿𝗮, 𝗱𝗶𝗻𝗴𝗮𝗻𝗮 𝗻𝗶𝗮𝗹𝗼𝗵𝗮 𝗻𝘆 𝗳𝗮𝗻𝗱𝗿𝗮𝘃𝗼𝗻𝗮𝗻𝗮

Talohan’izao atrikasa izao dia efa notanterahina tany amin’ny faritra maro ny fakan-kevitra nifandray amin’ireo mpisehatra isan-tsokajiny. Tafiditra ao anatin’izany ny tao Analamanga, Diana, Boeny, Matsiatra Ambony ary Atsimo Andrefana.

Nandritra ireo fihaonana ireo no nahafahan’ireo mpandray anjara naneho ny ahiahiny sy ny tolo-keviny, indrindra momba ireo andinin-dalàna heverina fa mety hanohintohina ny fahalalahana maneho hevitra sy ny fahalalahana amin’ny asa fanaovan-gazety.

Vokatry ny fanangonana ireo hevitra ireo, dia miroso amin’ny fandrindrana sy famintinana azy ny Minisitera, mba hahafahana manolotra fanitsiana sy fanavaozana hentitra sy mifototra amin’ny zava-misy.

𝗙𝗶𝘀𝗶𝗮𝗻’𝗶𝗿𝗲𝗼 𝘁𝗼𝗺𝗽𝗼𝗻’𝗮𝗻𝗱𝗿𝗮𝗶𝗸𝗶𝘁𝗿𝗮 𝘀𝘆 𝗿𝗮𝗳𝗶𝘁𝗿𝗮 𝗺𝗽𝗶𝘀𝗲𝗵𝗮𝘁𝗿𝗮

Nanatrika sy nanome lanja ny fotoana ny Sekretera Jeneralin’ny Minisitera misahana ny Serasera sy ny Kolontsaina, Rasolofonirina Miary, nisolo tena ny Minisitra Gascar Fenosoa.

Niara-nanotrona azy ny Tale Jeneralin’ny Serasera, Rakotomalala Faly Mahefanirina, izay nandray anjara mavitrika tamin’ny fanatanterahana ireo dingana rehetra nanomboka tamin’ny fakan-kevitra hatramin’izao fandravonana izao.

Anisan’ireo niara-niasa akaiky tamin’ny fanatanterahana ny dingana ny Komity manokana ivondronan’ny mpanao gazety (Comité ad’hoc) tarihin’i Andriamanambe Raoto, sy ny Komity vonjimaika hisolo toerana ny Holafitry ny mpanao gazety (CTOJM) notarihin’i Raharison Andry.

𝗙𝗮𝗻𝗮𝗺𝗯𝘆 𝘃𝗮𝗼𝘃𝗮𝗼 : 𝗻𝗼𝗺𝗲𝗿𝗶𝗸𝗮, 𝗜𝗔 𝗮𝗿𝘆 𝘁𝗼𝗻𝘁𝗼𝗹𝗼𝗻’𝗻𝘆 𝘁𝗮𝗺𝗯𝗮𝗷𝗼𝘁𝗿𝗮

Ankoatra ny fanadihadiana ireo lalàna efa misy, dia nifantoka ihany koa ny adihevitra tamin’ny fanamby ateraky ny fivoaran’ny teknolojia.

Anisan’izany ny fidiran’ny faharanitan-tsaina artifisialy (IA), ny fivelaran’ny tambajotra sosialy, ary ny fiarovana ireo mpandrisika an-tambajotra na “influenceurs”, indrindra fa ny fanasongadinana ny asan’ireo Mpanao Gazety an’habaka (Presse en ligne)

Tanjona amin’izany ny fametrahana rafitra ara-dalàna manara-penitra, mahavaly ny zava-misy ankehitriny, nefa tsy manimba ny zo fototry ny fahalalahana maneho hevitra.

𝗙𝗶𝗮𝗿𝗮𝗵𝗮-𝗺𝗶𝗮𝘀𝗮 𝗶𝗿𝗮𝗶𝘀𝗮𝗺-𝗽𝗶𝗿𝗲𝗻𝗲𝗻𝗮

Niara-niasa tamin’ny fanatanterahana ireo fakan-kevitra ny PNUD, ny UNESCO ary ireo fikambanana tsy miankina miaro ny zon’ny mpanao gazety.

Nandray anjara tamin’ity atrikasa ity ihany koa ny Tale misahana ny UNESCO ho an’ny faritra Afrika Andrefana, Ramatoa Hito Misako, sy ny manampahaizana manokana momba ny fahalalahana maneho hevitra avy amin’ny Firenena Mikambana, Joan Barata.

𝗠𝗮𝗻𝗸𝗮𝗻𝘆 𝗮𝗺𝗶𝗻’𝗻𝘆 𝗳𝗮𝗻𝗮𝘃𝗮𝗼𝘇𝗮𝗻𝗮 𝗹𝗮𝗹𝗶𝗻𝗮

Ity atrikasa fandravonana ity no mamaritra ny dingana manaraka amin’ny fanavaozana ny sehatry ny serasera eto Madagasikara.

Vinavinaina hiteraka rafitra mazava, manaraka ny fenitra iraisam-pirenena, ary manome antoka ny fahalalahana sy ny maha-matihanina ny asa fanaovan-gazety, ny voka-pikarohana sy ny tolo-kevitra hivoitra avy amin’izao dingana izao.